Ingozi yokweqisa otshwaleni ngamaholidi
UKUPHUZA ngokweqile ngesikhathi samaholidi kungakubeka engcupheni yokuphathwa yisifo senhliziyo nesohlangothi.
Abantu abaningi abazithatha njengabaphuzayo nabangaphuzi bavame ukuthi basebenzise isikhathi samaholidi, ikakhulu akaDisemba, ukuthi bazijabulise. Ukuzijabulisa kuvame ukuhambisana nokuphuza uphuzo oludakayo.
Isikhathi esiningi abantu ababe besazikalela ukuthi baphuza kangakanani nokuthi ukuphuza kakhulu izinsuku zilandelana kunamthelela muni emzimbeni.
NgokukaNksz Nicole Jennings, wenkampani ekhiqiza imishanguzo iPharma Dynamics, ukuphuza kakhulu ngamaholidi kubeka abantu engcupheni yokuhlaselwa yisifo senhliziyo okubizwa ngeHoliday Heart Syndrome. Uthe ukuhlaselwa yisifo senhliziyo ngamaholidi kuvame ukwenzeka nakubantu abebengeke babe sengozini yokuhlaselwa yisifo senhliziyo nabangakaze babe nezimpawu zesifo senhliziyo phambilini. Isifo senhliziyo sivame ukubahlasela ngamaholidi ngenxa yokweqisa otshwaleni.
“Umthelela wotshwala enhliziyweni uncike ekutheni umuntu uneminyaka emingaki, isimo sempilo yakhe sinjani, izinga lotshwala abuphuzile nokuthi uvame ukuphuza kangakanani. Ukuphuza kakhulu kungaba nomthelela ongemuhle enhliziyweni ngokuhamba kwesikhathi ngoba kungakubeka engozini yokuphathwa yisifo sohlangothi, kulimaze amamasela enhliziyo kwenze kube nzima ukuthi iqhubeke nokuphampa igazi njengokujwayelekile,” kusho uNksz Jennings.
Uthe ukuhlaselwa yinhliziyo ngamaholidi kuhambisana nokuphuza utshwala obuningi esikhathini esincane futhi kungenza inhliziyo ishaye kakhulu, ukunqamuka komoya uma uphefumula nobuhlungu esifubeni. Zonke lezi zimpawu ezithusayo uma zenzeka zisuke zingakwazi ukwelapheka ngokuthi wehlise ukuphuza.
Ngesikhathi uDkt Philip Ettinger enza ucwaningo eminyakeni engaphezu kwengu-40 eyedlule wathola ukuthi kunomehluko omkhulu ekushayeni kwenhliziyo yeziguli zakhe emuva kokuthi ziphuze kakhulu ngamaholidi. Wathola ukuthi ukushaya kwenhliziyo bekuphazamiseka ingashayi ngendlela ejwayelekile.
Ngokusho kukaNksz Jennings kubalulekile ukuthi uma abantu bejabula bacabangele isimo sempilo yabo, banakekele izinhliziyo zabo ngokugwema ukuphuza ngokweqile ikakhulu labo abanenkinga yenhliziyo, abanomfutho ophezulu wegazi, abakhuluphele ngokweqile nababhemayo,
Ngaphandle kokuphuza kakhulu ngesikhathi samaholidi okunye okubeka abantu engozini yesifo senhliziyo wukudla kakhulu, ikakhulu ukudla okuthakwe ngosawoti.
Usawoti omningi udala ukuthi umzimba ugcine amanzi amaningi ungawakhiphi njengokulindelekile nokuholela emfuthweni ophezulu wegazi nokubeka abantu engozini yesifo senhliziyo. Ukudla ukudla okunosawoti omningi ngamaholidi kungadala ingozi.
“Kungaba kuhle ukunciphisa ekuphuzeni nezinye iziphuzo ezingebona utshwala njengekhofi, iziphuzo ezinika amandla (energy drinks) neziphuzo ezihlohlozayo ngoba lezi ziphuzo zithakwe ngecaffeine okuyisithako esivame ukucindeza inhliziyo. Kubalulekile nokuzama ukugwema ingcindezi bese uyazivocavoca ngamaholidi. Okunye okubalulekile wukuzinika isikhathi esanele sokulala,” kusho uNksz Jennings.
Ngesikhathi samaholidi akuvamile ukuthi ubone abantu bekhathalele ukuphuza amanzi njengoba benza unyaka wonke. Ngisho abantu abangabuphuzi utshwala bavame ukugxila kakhulu eziphuzweni ezihlohlozayo nasekuphuzeni amajusi anoshukela. Kubalulekile ukuba nesikhathi sokuphuza amanzi anele. Noma ukade uphuza utshwala kubalulekile ukulandelisa ngamanzi ngoba utshwala bunciphisa amanzi emzimbeni.
Kunezimpawu ezihlobene nokuhlaselwa yisifo senhliziyo okumele uziqaphele. Lezi zimpawu akufanele zithathwe kancane ikakhulu ngesikhathi samaholidi. Abantu abanenkinga yenhliziyo kufanele bahlale beziqaphile. Abantu abangakaze babe nenkinga yenhliziyo nabo bangaba sengozini yokuhlaselwa yisifo senhliziyo ngesikhathi samaholidi.
Qaphela lezi zimpawu ezilandelayo: Ubuhlungu besifuba Ukushaya kakhulu kwenhliziyo Ukukhathala Ukunqamuka komoya uma uphefumula
Nenzululwane