Uphenyo ngembangela yomlilo ongqongqise inkampani
KUPHENYWA ngembangela yomlilo oqubuke kwenye yezinkampani eziseNingizimu yeTheku izolo ekuseni.
UMnuz Garrith Jamieson, wenkampani yezimo eziphuthumayo iRescue Care, uthe baphuthume efemini ebisha emgwaqweni uSouth Coast eduze komgwaqo uKenyon Howden, eThekwini, izolo ekuseni bafica umlilo obusha ubuhanguhangu.
“Sifice izicishamlilo zikaMasipala weTheku zimatasa zicisha umlilo. Zigcine ziphumelele ukucisha futhi akulimalanga muntu,” kusho uJamieson.
Uthe bathole ukuthi umlilo uqale ngehora lokuqala entathakusa izolo efemini egcina irayisi, izinongo namabhokisi kamentshisi.
Uveze ukuthi umlilo uvuthe waze wadlulela esitezi sokuqala wacekela uphahla oluvele lwavodloka.
UCaptain Nqobile Gwala wamaphoyisa KwaZulu-Natal ukuqinisekisile ukuthi kube nomlilo oqubuke kwenye yamafemu aseThekwini wathi kodwa alikho icala elivuliwe.
Uthe ubhekile eziteshini zabo eziseduze nale femu okuyisiteshi saseMbilo nesaseMontclair kodwa akunacala elivuliwe.
Imizamo yokuthola abanikazi befemu ayiphumelelanga njengoba bengathandanga ukuphawula ezintathelini ebezisendaweni yesigameko izolo.
Akuyona ifemu yokuqala lena eshe kwangavulwa icala ngoba ngoMashi kwasha ifemu okusolakala ukuthi yayigcina amakhandlela kwaba mnyama bhuqe eRossburgh.
Alikho icala elavulwa kanti nanamhlanje akukho mnikazi wefemu owakhuluma nezintatheli ngembangela yawo nokuthi walahlekelwa yimalini ngokusha kwayo.