Ihlonishwe ngeziqu zobudokotela inkosi yesizwe sakwaMaphumulo
IHLONISHWE ngeziqu zobudokotela yisikhungo sokufundela ezenkolo inkosi yakwaMaphumlo eMbumbulu ngeqhaza layo ekuthuthukisweni komphakathi.
Inkosi uNathi Maphumulo ihloniswe yiHoly Nation Bible College.
Ihlonishwe ngeqhaza layo ebholeni likanobhutshuzwayo njengoba yayingusihlalo weNathi Lions nangeqhaza layo ekuletheni uzinzo esizweni sayo.
“Bengingalindele ukuthi ngihlonishwe ngejazi eliphakeme kanjena. Ngizizwa ngithobekile ngoba konke ebengikwenzela umphakathi bengisiza nje ngoba ngiwuthanda. Ngimangele impela ngokuhlonishwa ngale ndlela,” kusho inkosi.
UMaphumulo onezingane ezingu-12 namakhosikazi amathathu wagcina kwa-matric wabe eseqala amabhizinisi njengoba ebeneqembu lebhola eligijima kwiNational First Division yePremier Soccer League, iNathi Lions, enamathaveni nezitolo eMlaza.
Ngaphezu kwalokho unenkampani yonogada iNathi Security.
“Iqembu ngalidayisa ngoba umsebenzi wokuhola isizwe nowomndeni wami wawungidinga. Ngisaqhubeka nokuthanda ezemidlalo njengoba ngifuna ukuqala ezinye izinhlelo zokuthuthukisa abantu abasha ngezemidlalo,” kusho uMaphumulo.
Uthe ubengusihlalo iminyaka eminingi ebandleni lakhe iBantu Congregational Church wagcina ecela ukunikeza abanye basebandleni ithuba lokuphatha lesi sikhundla.
UMaphumulo wasungula inhlangano yomama abenza ubuhlalu. Bangamaqembu angu20 anabantu abangu-100. Omama bathola isibonelelo kuhulumeni esingengaphansi kukaR1000 umuntu emunye.
“Njengoba sengithole lezi ziqu ngizoqhubeka ngisebenzele umphakathi ngenze isiqiniseko sokuthi ngigqugquzela ezemidlalo nezinye izinhlelo entsheni. Okumqoka kakhulu kimina ukubona abantu engibaholayo bephumelela futhi bethola amathuba abengekho phambilini,” kusho uMaphumulo.