Kushone obezifela ngoSomnandi
ZIME nse izinhlelo zesihlabani somculo kamaskandi kushona omunye wabalandeli baso ebesinezinhlelo ezinkulu naye. UThokozani “Somnandi” Langa ukhala ezimathonsi ngoMzwandile Mswazi Dlamini waseMacambini obenguthisha esifundazweni iMpumalanga.
USomnandi uthe uMswazi oshone engozini yemoto ngeledlule ubemsiza ngezinto ezithinta ukumaketha umculo wakhe uma engafundisi. Uthe ubebonakala noMswazi noma kuphi lapho ebehamba khona nobekwenza abaningi bazitshele ukuthi bahlobene.
“Ubehlala enemibono emihle futhi ekwazi ukungidayisela umculo wami. Ushone kusekuningi esikuhlela naye obekuzongisiza kuphakamise nomculo wami. Ngilimele kakhulu ngokushona kwakhe,” kusho uSomnandi.
Eqhuba uthe uMswazi umshiye nesifundo sokuzithoba kubantu yize ebefundile kunaye. Uphinde wathi ngesikhathi eqala ukumazi wayengazitsheli ukuthi uyisifundiswa ngoba wayengazigqamisi futhi ebazisa nabanye abantu.
“Ngathuka ngelinye ilanga ekhuluma ngamanyuvesi afunde kuwo ngamangazwa nayindlela aziphatha ngayo phakathi kwabantu. Ubehlula ngisho abangayanga esikoleni ngenhlonipho. Bese sifana nezelamani ngendlela abengihlonipha ngayo engangibizi ngegama. Ngilahlekelwe ngoba nakuFacebook uyena obetshela abantu ukuthi ngiyaphi,” kusho uSomnandi.
NgoLwesine uvakashele umndeni kamufi eyowududuza. Kuthiwa uMswazi ushona nje ubelungiselela umcimbi womemulo kadadewabo okuphoqe ukuthi uqhubeke ngempelasonto yize engasekho. UMswazi uzongcwatshwa kubo eMacambini ngoMgqibelo. Abalandeli bakaSomnandi kulindeleke ukuthi batheleke ngobuningi babo beyophelezela umufi.