UMoloi akayingeni eyamarekhodi
UMQEQESHI weChippa United, uTebogo Moloi, usole abadlali bakhe ngokuzithwala okudalwe wukwehlula iKaizer Chiefs ngesonto eledlule.
IChili Boys ibuyiselwe kwamhlaba yi-Ajax Cape Town eyixebule ngo 1-0 emdlalweni we-Absa Premiership eBidvest Stadium, eGauteng, ngoMgqibelo ebusuku.
Igoli le-Urban Warriors lishaywe nguThabo Mosadi. IChippa isahlulwe kabili emidlalweni engu-13 ngaphansi kukaMoloi othathe izintambo kuDan Malesela okhonjwe indlela ekuqaleni kwesizini.
NgoLwesihlanu, usihlalo weChippa uSiviwe Mpengesi, ugixabeze uMoloi ngesikhundla sokuqeqesha ngokugcwele. Emuva komdlalo ne-Ajax uMoloi uthe abadlali bakhe abazange benze okwanele.
“Besingekho nje enkundleni. I-Ajax ibiyidinga kakhulu iwini. Abadlali kufanele bakuqonde ukuthi akukapheli, iseyinde indlela esazohanjwa. Ngicabanga ukuthi ukwehlula iChiefs kusingene emakhanda. Kusukela kukhale impempe yokuqala umdlalo besingekho,” kusho uMoloi.
Lo mqeqeshi uqokwe wababaqwaqwada emakhanda bonke abanye ngoNovemba, emahhovisi ePSL izolo emini. Umdlali omuke nomklomelo kaNovemba uHlompho Kekana weMamelodi Sundowns. Igoli elidle umhlanganiso elikaNdivhuwo Ravhuhali wePolokwane City.
“Bengishilo ukuthi uma sizoyibukela phansi i-Ajax asivele sikhohlwe yilo mdlalo. Akukhona ukuthi abadlali abakhombisanga umdlandla kodwa abakhombisanga ukulangazelela. Ngeke ngilokhu ngibeka izaba eziningi. Abadlali abafinyelelanga ezingeni labo esilaziyo. Sifike enkundleni sathatha izinto kalula. Yilokhu ke okutholayo uma wenza njalo. Sizobuyela emuva siyowubhekisisa lo mdlalo. Abadlali kufanele bazibuze ukuthi yini abafuna ukuyizuza kule sizini.”
UMoloi uyaqala ukuthola isikhundla sokuqeqesha ngokuzimela kwiPremiership emuva kweminyaka esebenza ngaphansi kwabaqeqeshi abehlukene kwi-Orlando Pirates. Usebenze isikhashana ngaphansi kukaMalesela kodwa baphambana ngemibono, washiya phansi.
Nakuba abaphathi beChili Boys benelisekile ngendlela asebenza ngayo njengoba esahlulwe kabili emidlalweni engu-13 kodwa yena uthe akayingeni indaba yamarekhodi.
“Anginandaba neyerekhodi lokungehlulwa emidlalweni engu-10. Uma ngokungehlulwa emidlalweni engu-10 ngizowina iligi ngizojabula. Kodwa uma emuva kwalokho ngizoba semsileni we-log, nginenkinga ngalokho. Kimina amarekhodi awasho lutho. Okubalulekile wukuthi singene ensimi sidlale kahle, sithole amaphuzu sibone ukuthi siphelela kuphi uma kuphela isizini,” kusho uMoloi.
“Bengitshela abadlali ukuthi kufanele banikeze abalandeli isipho sikaKhisimuzi ngokuthi bawine imidlalo emibili esele ngoba bahlale benathi sonke isikhathi. Kuyaphoxa ukuthi asikwazanga ukubanika amaphuzu amathathu kowe-Ajax, wonke umuntu aziyo ukuthi besingawathola. Sesibheke ukuwina umdlalo wokugcina sibambe isipho sikaKhisimuzi ngaphambi kokuya emakhaya.”
IChippa izovala unyaka nePolokwane City emdlalweni wePremiership eNelson Mandela Bay Stadium, eBhayi, ngoMgqibelo.