Zibhodla umlilo izinduna ngemiholo
ZIBHODLA umlilo izinduna ngesiphakamiso esenziwe yilungu le-ANC esiShayamthetho KwaZuluNatal sokuthi kumiswe imiholo yazo.
UMnuz Sboniso Duma oyilungu le-ANC esiShayathetho KwaZulu-Natal uthe imiholo yezinduna iyijoka kuhulumeni futhi iphazamisa nokuhanjiswa kwezidingo emphakathini.
UDuma uthe imiholo yezinduna kumele iphoselwe inselelo, iphinde ivalwe.
“Zimbili izindlela zokulungisa le ndaba, ukuchibiyela umthetho noma kuyiwe enkantolo. Manje sidinga uR1.5 billion, ukuze kukhokhwe imali ekweletwa izinduna. Izovelaphi leyo mali?” kubuza uDuma. Ucashunwe esho lokhu ngesikhathi kudingidwa udaba lomthethosivivinywa wezamaholo ezinduna.
USihlalo weziNduna KwaZulu-Natal, uMnuz Vusi Mthethwa usabise ngokuthi kungase kususe uthuthuva ezizweni zamakhosi ukumiswa kwemiholo yezinduna.
Uthe nguMengameli Jacob Zuma owaphasisa ukuthi bahole.
Uthe bayayizwa inkulumo ethi kumele ivalwe imiholo yabo, wengeza ngokuthi bazoyiphikisa ngayo yonke indlela.
“Kuyadumaza ukuthi kusekhona abantu abawubukela phansi umsebenzi wethu,” kusho uMthethwa.
Uthe ukuvalwa kwamaholo ezinduna kuzosusa umsindo omkhulu, okuzoba nzima ukuwubhula. “Kumanje izinduna zilindele imali yazo eziyikweletwa uhulumeni,” kusho uMthethwa. Uthe emhlanganweni ababa nawo noNdunankulu wesifundazwe uMnuz Willies Mchunu bathenjiswa ukuthi imali abakweletwa yona izokhokhwa.
Zingaphezu kuka3000 izinduna zamakhosi aseNdlunkulu kaZulu esifundazweni.
Izinduna zihola R8000, ngenyanga. Ziqale ukuhola kusukela ngo-2015.
Uhulumeni udinga uR300 million ngonyaka ukuze ukwazi ukuziholela.
Okwamanje u-50%, wamaholo ezinduna uvela kuMnyango wezokuBusa ngokuBambisana neziNdaba zoMdabu KwaZulu-Natal, kuthi enye imali inikelwe yiminyango ehlukene.
Ethula isabelo-mali sakhe kulo nyaka, uNgqongqoshe wezeziMali esifundazweni uNkk Belinda Scott wakubeka kwacaca ukuthi asikho isabelomali semiholo yezinduna.
Wathi iminyango eyahlukene ezohlanganisa ukuze izinduna zikwazi ukuhola.
USihlalo wekomiti lezokuBusa ngokuBambisana neziNdaba zoMdabu esiShayamthetho KwaZulu-Natal, uNkk Nonzwakazi SwartbooiNtombela uthe uDuma ubezenzela umbono wakhe.
“Izinduna kumanje ziyahola. Ukuthatha imiholo yazo kungadala imibhikisho enzima. Kumanje zifuna futhi ukukhokhelwa imali ezikweletwa yona ebalelwa u-R1.5 billion, olingana nesabelomali soMnyango wezokuBusa ngokuBambisana neziNdaba zoMdabu,” kusho SwartbooiNtombela.