Akufundiswe ukubhukuda ezikoleni zabamnyama
SESIYAPHOQA isimo ukuthi ifakelwe izibuko indaba yokuqinisa ukuqeqeshelwa ukubhukuda ezikoleni zabantu abamnyama ezisemalokishini nezisemakhaya.
Ukwanda kwezigameko zokuminza kwezingane kutshengisa ukuthi kukhona osekumele kwenziwe ukugwema lesi sihlava esiqeda izingane zethu.
Ukungakwazi ukubhukuda nokuhloma ngolwazi lwamanzi, kunomthelela ngokuba khona kwalezi zigameko.
Uma kuqala kwethwasa ihlobo ziyaqala nezigameko zokuminza kwezingane esibika ngazo kakhulu ngesikhathi sasehlobo.
Esinye salezi zigameko ngesibike ngaso ngoLwesibili lapho kuminze khona abangani ababili base-Oakford ngaseVerulam uMlondi Dlamini (10) noLibongwe Ngcobo (11), abaminze emfuleni uMdloti.
Imvamisa izingane ezindaweni ezisemakhaya ziyaye zizifundele ukubhukuda emadamini nasemifuleni kanti ingozi ngalokhu wukuthi ngenkathi besafunda basuke bengaqashiwe futhi kungenzeka noma yini njengoba bengaqeqeshwa wumbhukudi noma wungoti kwezamanzi nokubhukuda.
Izikole ezixube izinhlanga ezisemadolobheni zivame ukuba nama-swimming pool lapho ziqeqesha khona abafundi ngokubhukuda nangengozi yamanzi.
Ngisho izikole ezingenawo ama-swimming pool emagcekeni esikole ziyaye ziqashe awomphakathi noma izikhungo zokubhukuda, inqobo nje uma kuqeqeshwe abafundi njengoba zikholelwa ukuthi kumele baqeqeshwe besebancane ukugwema izingozi ezinjengalezi ezenzeke e-Oakford.
Sengathi uMnyango wezeMfundo ungake uyifakele izibuko le ndaba yokuthi uma sekungena izifundo eziphathele nokunyakazisa umzimba, phecelezi iPhysical Education, igqugquzelwe le yokufunda ukubhukuda ezikoleni zabamnyama.
Siyaqonda ukuthi ezinye izikole zikude nezindawo ezinama-swimming pool, ikakhulukazi emakhaya, mhlawumbe kungaba nohlelo oluhlelekile lokuthi izingane zivakashiwe esikoleni esinayo noma esikhungweni lapho zizofike ziqeqeshelwe khona ukubhukuda ngoba khona ziyaphela izingane ziminza uma sekungene ihlobo.