Isikhalo seyabaseshi kwekaMoerane
INHLOKO yabaseshi ophikweni oluphenya amacala enziwe amaphoyisa, uMnuz Matthews Sesoko, ikhala ngokuthi amaphoyisa asabisa ngokubulala abaseshi babo uma bewaphenya.
Ethula ubufakazi kwiKhomishini kaMoerane ephenya ngokubulawa kwabantu KwaZulu-Natal ehleli eMgungundlovu izolo, uSesoko uthe banamacala amaningi lapho abaseshi babo besatshiswa khona amaphoyisa.
“Ziningi izingqinamba esibhekana nazo uma sisebenza, enye yazo wukuthi abaseshi bethu basatshiswa ngokubulawa amaphoyisa abasuke bewaphenya,” kusho uSesoko.
Uthe enye ingqinamba ababhekana nayo wukuthi amanye amaphoyisa awafuni ukubathobela abaseshi babo.
“Emaphoyiseni kukhona le nto yezimendlela, kuyenzeka uthole ukuthi umseshi wethu uphenya uKaputeni bese ebukelwa phansi umseshi kodwa ngegunya esinalo esilinikwe umthethosisekelo sinamandla okuphenya noma ngubani ophule umthetho ngaphandle kokwesaba,” kusho uSesoko.
Uthe uma bephenya izikhulu zamaphoyisa lokhu kuthumela umyalezo emaphoyiseni emazingeni aphansi.
USesoko uthe banenkinga yokushoda kwezinsiza okugcina sekuphazamisa umsebenzi wabo, wengeza ngokuthi ngenxa yokushoda kwezinsiza sebeyaphoqeleka ukuthi bagxile kakhulu emacaleni enkohlakalo, ukubulala nokudlwengula. Uthe kodwa bayawabheka namanye amacala afana nokushaya.
“Siba namacala angaphezulu kuka-7 000 ngonyaka ezweni lonke kodwa sibe sinabaseshi abaphenya amacala abangu 216,” kusho uSesoko.
Uthe umseshi ngamunye ubheka amacala angu-140.
“Ngenxa yezinkinga zemali asikwazi ukuqasha abanye abaseshi siyaphoqeleka ukuthi singazivali izikhala esinazo,” kusho uSesoko. Uthe ngenxa yezinkinga zemali bayawavala amahhovisi abo angomahambanendlwana. USesoko uthe uma bengaba nesabelo-mali esikahle bangakwazi ukwenza umsebenzi wabo benze isiqiniseko sokuthi namaphoyisa awuvikela kahle umphakathi. Uncome uNgqongqoshe wamaphoyisa, uMnuz Fikile Mbalula, wathi mukhulu umehluko osukhona kwi-Ipid nendlela esiphethwe ngayo kusukela kungene yena.
“Uyasizamela nemali kodwa ayanele naye uhlale esho ukuthi i-Ipid idinga ukuthi ibe nezinsiza ukuze iqhube umsebenzi,” kusho uSesoko.
USesoko ubehamba nezikhulu ze-Ipid okubalwa nesikhulu sayo uMnuz Robert McBride. Kodwa nguSesoko kuphela ofungile njengoba ebethula ubufakazi. UMcBride ubebonakala emhlebela emchushisa ngokuthi akayiphendule kanjani eminye imibuzo.
UKhomishana uMoerane uthe iqhaza le-Ipid libalulekile ekuqedeni ukubulawa kwabantu yingakho beyibizile ukuthi izokwethula ubufakazi.
“Kunesikhalo esikhulu sokuthi amaphoyisa awawenzi umsebenzi ngendlela efanele kanti i-Ipid iqaphe ukusebenza kwamaphoyisa iphenye nangokusebenza kwayo. Ngaleyo ndlela iqhaza lenu libalulekile kithina njengeKhomishini njengoba siphenya ngokubulawa kwabantu esifundazweni,” kusho uMoerane.