UDhlomo utuse abasebenza ngamaholidi
UNGQONGQOSHE wezeMpilo KwaZulu-Natal, uDkt Sibongiseni Dhlomo, ukhuze umkhuba wokuhlaselwa kwabezimo eziphuthumayo futhi kwebiwe nama-ambulensi.
UDhlomo ukusho lokhu ngesikhathi ethula amaambulensi amasha angu-20 azobe esetshenziswa ngabezimo eziphuthumayo ezifundeni ezahlukene KwaZulu-Natal, ePeople’s Park, eMoses Mabhida, izolo ekuseni.
Ekhuluma nabasebenzi bezimo eziphuthumayo ebebekhona uthe: “Nginifisela okuhle kodwa ngoba ngeke nibe nemindeni yenu ngamaholidi. Anivumelekile ukuhlaba ikhefu emsebenzini. Isibalo sabantu abazovakasha eKZN sizoba sikhulu kakhulu futhi nizobhekana nezingqinamba. Abanye benu bazodla isidlo sasekuseni nesasemini emgwaqweni,” kusho uDhlomo.
Uthe ukuhlengwa kwempilo yabantu kuncike ekutheni baphendule ngokushesha uma bedingeka. Uthe ihora lokuqala (lokuya lapho nibizwe khona) yilona elibaluleke kakhulu. Uthe njengoba kunokushoda kwegazi, ukufika kuqala kwabezimo eziphuthumayo endaweni yesigameko kungasiza ngoba bangakwazi ukubhandisha umuntu owophayo singabi khona isidingo sokuthi afakelwe igazi.
Uthe izimoto ezingu-20 ezintsha yize zingenele kodwa zizoba wusizo olukhulu futhi kuzoshaya uLwesibili sezithunyeliwe lapho kumele ziye khona.
“Abantu kumele bazi ukuthi izinsizakusebenza azenele futhi siyathemba ukuthi sizothenga amanye ngoFebhuwari. Kuyasikhathaza uma sesidunwa izimoto. Awukwazi ukuya phansi eMbongolwane noma koXopo ngoba usaba ukuthi uzodunwa, uphucwe iselula noma usatshiswe ngokubulawa,” kusho uDhlomo.
Uthe ama-ambulensi awasizona izimoto ezejwayelekile ngoba afana negumbi labagula kakhulu elihambayo.
“Kufakwe imishini yokusindisa impilo kuyo. Ungayithenga ngoR150 000 kodwa kufakwe imishini ebiza cishe uR1 million,” kusho uDhlomo.
Uthe akukho kuhle ukuthi abantu bayebe bese bethutha ngayo izimbuzi nommbila.
“Akuchazeki ukuthi uyebe bese uyayishintsha uyenze eyokuthutha ummbila,” kuqhuba uDhlomo.
Uthe abasebenzi kumele bathembeke bakhohlwe yilabo abebayo.
UDhlomo ubuye waveza nokuthi sebeluphothulile uhla lwabafundi abangu-405 abazotshalwa ezikhungweni zempilo abazobe besebenza kodwa beqeqeshelwa umsebenzi.
Uthe bazoqala ukusebenza ekuqaleni konyaka ozayo. Ababefake izicelo uthe bangabheka amagama abo kwi-website yabo.