Bafuna uguquko embonini kashukela
UNGQONGQOSHE wezokuThuthukiswa koMnotho nezokuVakasha KwaZulu-Natal uMnuz Sihle Zikalala usincomile isinqumo sekomiti lezohwebo nezimboni ePhalamende elifuna kube noguquko embonini kashukela.
Leli komiti lithe kufanele iSouth African Farmers Development Association (Safda) ithathwe njengenhlangano esemthethweni ngabeSouth African Sugar Association (Sasa) neSouth African Cane Growers’ Association (Sacga).
UZikalala uthe isinyathelo sekomiti siletha ithemba lokuthi imboni kashukela izoshintsha kwazise iSafda imele abalimi abamnyama embonini kashukela.
“Siyajabula ukuthi ikomiti lezohwebo nezimboni lizochibiyela umthetho iSugar Act ka-1978 obukhipha inyumbazane izinhlangano ezifana neSafda. Sikholwa wukuthi uma iSafda ithathwa njengenhlangano esemthethweni isebenzisana neSasa neSacga, kuzoba noguquko embonini kashukela. Kuthuthukise nomnotho waKwaZulu-Natal,” kusho uZikalala.
Uthe bazoqhubeka nezinhlelo zabo zokuthuthukisa ezolimo ezibizwa nge-Agrarina Socio Economic Transformation (RASET) ezizosiza abamnyama ukuthi bangene emnothweni wezolimo badale namathuba omsebenzi.
Uveze ukuthi uhulumeni waKwaZulu-Natal usebenzisana neTongaat-Hulett Sugar South Africa ukuze kusizwe abalimi abamnyama eFelixton, Darnall, Amatikulu naseMaidstone.
“Sibeke eceleni uR50 million wokusiza abalimi abamnyama embonini kashukela,” kusho uZikalala