Bethulelwa isigqoko abampimpa ababulala obhejane
BANCOMA umphakathi ompimpa ababulala izilwane zasendle abezeMvelo KZN Wildlife njengoba bethe kuboshwe izigebengu ezingu-150 kulo nyaka emva kokuthi amalungu emiphakathi eyakhele iziqiwi ezimpimpile.
UMnuz Musa Mntambo obhekele ezokuxhumana kwezeMvelo KZN Wildlife uthe bebengeke babophe izigebengu eziningi kanjena ukube umphakathi awuzona izindlebe namehlo abo ezindaweni ezihlukene.
“Silahlekelwe obhejane abangu-218 kulo nyaka. Okusijabulisayo wukuthi abantu basebenzisana nathi ngokumpimpa ababulala obhejane nezinye izilwane zasendle. Ababoshiwe sifuna babhadle ejele ukuze nabacabanga ukubulala izilwane zasendle basheshe bawuyeke lowo mqondo,” kusho uMntambo.
Uthe baphinde basebenzisane nezinye izinhlaka zomthetho okubalwa amasosha, amaphoyisa noKlebe ukulwa nokubulawa kobhejane nobugebengu obuhleliwe.
Kuzwelonke ngoJulayi, isibalo sobhejane ababulewe besimi ku-529 uma kuqhathaniswa no-542 wobhejane abese bebulewe ngonyaka odlule.
Isiqiwi esihamba phambili ngokubulawa kobhejane yiKruger National Park elahlekelwe ngabangu-243 uma kuqhathaniswa no-354 owawubulewe ngoJulayi wonyaka odlule.
Lokhu kusho ukuthi ukubulawa kobhejane kwehle ngo-34% kulo nyaka ngenxa yokufakwa kwamasosha, amaphoyisa, oKlebe nomphakathi ogqugquzelwa ukuthi ubike uma ubona izigebengu zingena eziqiwini.
Obhejane babulawelwa uphondo lwabo okukholakala ukuthi lwelapha umdlavuza, lwenze amadoda abe nogazi futhi abe wuqanduqandu ocansini emazweni aseMpumalanga okubalwa iChina neVietnam.
Yize kunenkolelo yokuthi uphondo lukabhejane lwelapha umdlavuza ososayensi bayakuphika lokhu kanti uNgqongqoshe wezeMvelo eNingizimu Afrika uNkk Edna Molewa uthe banohlelo lokufundisa abantu baseVietnam ukuthi uphondo lukabhejane aluwelaphi umdlavuza.
Uthe uphondo lukabhejane lwakhiwe yizinwele zikabhejane ezihlanganayo zigcine sezakhe uphondo.