Bafuna igunya lokujezisa ezikahulumeni
UMTHETHO ohlongozwayo ungase unikeze ongqongqoshe nePhalamende amandla okulawula okwenzeka ezinkampanini zikahulumeni.
NgoLwesibili, ikomiti elibhekelele imithetho nezokuphatha ePhalamende lithe kufanele kulungiswe imithetho ethile ukuze iPhalamende libe namandla okukhuza ngaphambi kokuthi konakale izinto ezinkampanini zikahulumeni.
USihlalo wekomiti uNksz Ayanda Dlodlo obuye abe nguNgqongqoshe wezaseKhaya kuleli uthe ongqongqoshe kufanele babe namandla okushintsha okwenzeka ezinkampanini zikahulumeni nokubiza izikhulu ezingenzi kahle.
“Sifuna ukuphathwa kwezinkampani zikahulumeni kube sezingeni eliphezulu. Sifuna ukuba namandla okubiza abantu abangawenzi umsebenzi wabo ngoba izinkampani zikahulumeni zinenkinga yokuxhashazwa kwemali nenkohlakalo,” kusho uNksz Dlodlo.
Phakathi kwezinkampani zikahulumeni eziba sematheni ngokungaphathwa kahle kwemali kubalwa i-Eskom, Passenger Rail Agency of South Africa (Prasa) neSouth African Airways.
Kumanje kunophenyo olwenziwayo ngokusetshenziswa kombuso yidlanzana nenkohlakalo ebidla lubi kwa-Eskom.
UNgqongqoshe wamaBhizinisi kaHulumeni, uNksz Lynne Brown useziphendulele kwabenza uphenyo nge-Eskom, wathi wayeholelwa ophathe yizikhulu.
“Sifuna ukwazi ukuthi imali isebenza kanjani ezinkampanini zikahulumeni. Ukuze uma ingasakwenzi lokho obekuthiwe izokwenza kujeziswe abantu,” kusho uNksz Dlodlo.
Uthe umthetho abawuhlongozayo uzophinde ubheke nobudlelwano phakathi kwamaqembu epolitiki nohulumeni.
I-ANC nayo ayisahambisani nokujutshwa kwamaqabane ezinkampanini ezithile njengoba ithi lokhu kuphazamisa ukusebenza kwazo.
Ifuna kuqashwe abantu abaneziqu zomsebenzi abazowenza hhayi amaqabane kuphela.