UKadodia akacacisi ngesijeziso sikaSaal
USIHLALO weMaritzburg United, uFarook Kadodia, ungena ezintangeni ngesijeziso somdlali waleli qembu uDevon Saal obhozomele umqeqeshi bebanga ukuthi umncishe isikimu emasontweni edlule.
USaal ujoyine iTeam of Choice ekuqaleni kwesizini ka-2017/2018 esuka kwiMilano United yaseKapa edlala kwiNational First Division (NFD). Bekubhekwe ukuthi azovala isikhala esivuleke emuva kokuhamba kobengukaputeni uKurt Lentjies oseyibamba kwiChippa United. Kuvele ukuthi ngaphambi komdlalo nePlatinum Stars, uSaal ubhozomele umqeqeshi uFadlu Davids phambi kwabanye abadlali emuva kokuthola ukuthi akamfakanga kubadlali abangu-18 ababezodlala. Emuva kwalokho ubizelwe ekomitini leqembu eliqondisa izigwegwe. Bekuthiwa uFadlu ufuna ukwenza isibonelo ngaye.
Izolo, uKadodia, akafunanga ukuphumela obala ngesinqumo abasithathile.
“Engingakusho ukuthi uSaal usezodlalela elinye iqembu. Ukuba simxoshile ngabe simnikeze incwadi yokumkhulula. Uma konke sekuphelile ngizokwazisa,” kusho uKadodia.
Ngokwenkulumo kaKadodia kungenzeka ukuthi uSaal uzobokelekiswa noma uzodayiselwa elinye iqembu ngenyanga ezayo uma sekuvulwe iwindi lokushintshana ngabadlali.
Umthombo weSolezwe ongaphakathi kwiTeam of Choice uthe akuqondakali ukuthi uSaal uxoshiwe noma usazoqhubeka nokudlala kuleli qembu.
Ngaphandle kukaSaal, umdlali wase-Australia, uLiam Youlley okuvele ukuthi utheleke ejimini ebukhile, uphunyukile ogibeni.
“Emuva kokukhuluma nawe ocingweni ngesonto eledlule, ngimbizile umdlali. Kudingeke simfake ingcindezi ukuze akhulume iqiniso. Sigcine simhlolile sathola ukuthi ayilona iqiniso indaba yokuthi ufike ephuzile ejimini, bekuyizinsolo nje,” kusho uKadodia.
Phezu kokuba uKadodia engafuni ukukhuluma eyabadlali bakhe abafunwa amanye amaqembu kodwa isiqale phansi indaba yokuthi i-Orlando Pirates ifuna umgadli weTeam of Choice u-Evans Rusike oshaye amagoli amabili ngesikathi leli qembu libhaxabula iBaroka ngo 3-1 eMphithi ngesonto eledlule.
IMaritzburg kade igadulisana neMamelodi Sundowns emdlalweni we-Absa Premiership eLoftus Stadium, ePitoli izolo ebusuku. UKadodia ubebone ukuthi bazoyibuyisela kwamhlaba iSundowns. Emdlalweni wokugcina wonyaka iTeam of Choice izobhekana neLamontville Golden Arrows ePrincess Magogo Stadium, KwaMashu, ngeSonto ngo-3.30 ntambama.