‘Kuphole amanxeba ngokwethula i-OPW’
UMETHULI wohlelo i-Our Perfect Wedding, uNomsa Buthelezi, uthe ukwethula lolu hlelo kupholise amanxeba okushonelwa yisithandwa sakhe ayezoshada naso ngo-2013.
NgeSonto le ntokazi izokwethula lolu hlelo okokugcina kuMzansi Magic ngo-7 ebusuku.
Esikhaleni sikaNomsa kuzongena uLerato Moloi, owayelingisa kuMuvhango.
Kuzothi maphakathi noJanuwari kuqale intokazi eyatholakala kufunwa umethuli omusha, uKayise Ngqula (26).
“Ngilijabulele ithuba engilinikezwe abaphathi balolu hlelo. Kuvaleke izilonda ebezivulekile kimi njengoba ngashiywa yisithandwa sami esase sihlele okuningi naso,” kusho uNomsa.
Uthe ukubona abantu bekhuluma ngothando, belungiselela nomshado wabo kumnike ithemba lokuthi uzophinde ahlangane nomuntu amthandayo.
“Ukufaka isandla la abashadayo bebedinga khona kungenze ngaziqhenya ngokuba sethimbeni le-OPW. Ngiyathemba ukuthi kukhona engikushiyile kulolu hlelo futhi abantu bayohlala bengikhumbula ngengikwenzile,” kuchaza uNomsa.
Uthe yize abantu babegxeka indlela agqoka ngayo uhlelo lusaqala kodwa uyazi ukuthi ubebanika abakufunayo.
Njengoba eseshiya kwi-OPW uNomsa uthe usezogxila ekulingiseni emidlalweni yeshashalazi.
“Ngibuyele ekulingiseni njengoba besishutha umdlalo wamahlaya othi Abo Mzala okhonjiswa kuSABC1. Namanje njengoba ngikhuluma nawe, ngiseNanda, eThekwini kukhona ifilimu engilingisa kuyo ebhalwe uThapelo Motloung,” kuchaza uNomsa.
Uthe nendawo ayilingisa emdlalweni iLockdown, imenze wakujabulela ukuba kulo mdlalo futhi nabantu bayijabulele indawo kaSlender.