Kuzogwetshwa umalume nomshana
UKHALA ngobunzima bempilo unkosikazi wephoyisa elabulawa lisesitobhini ekuqaleni konyaka.
UNksz Thandi Mthembu ethula ubufakazi izolo enkantolo uthe usephila kanzima selokhu kwabulawa uSergeant Mondli Chiliza (38).
Namuhla kuzogwetshwa umalume nomshana wakhe abalahlwe yicala lokubulala leli phoyisa elalisestobhini liya emsebenzini ngoFebhuwari nonyaka.
UMfanafuthi Ngidi (29) nomshana wakhe uMzwandile Ngidi (23) izolo balahlwe ngecala yinkantolo eNkulu yaseThekwini ngamacala okubulala uSergeant Mondli Chiliza (38).
UChiliza owayesebenza esiteshini saseKing Shaka Airport wabulawa ngoFebhuwari 28 nonyaka kwathathwa isibhamu sakhe somsebenzi. Izolo, ijaji Esther Stein lithole uMfanafuthi enecala lokubamba inkunzi ngendluzula kwathi uMzwandile walahlwa amacala amane, elokubulala, elokutholwa nesibhamu sephoyisa, ukutholwa nesibhamu esingekho emthethweni nelokutholwa nezinhlamvu ezingekho emthethweni.
Umshana waboshwa ebhace enyangeni eMthwalume ngoEphreli 1 nonyaka, umalume waboshwa kuqala eFolweni ngoMashi.
Ijaji libalahla ngecala lithe laba baba nonya nokungamcabangeli omunye umuntu ngesikhathi bebulala ngesihluku iphoyisa.
Ngokobufakazi obusenkantolo, ababulali babeyingxenye yeqembu lezigebengu elibamba abantu inkunzi eFolweni.
Ngelanga lesigameko, ekuseni ngabo-4 babebamba inkunzi besebenzisa isibhamu, bazithela phezu kwephoyisa liya emsebenzini.
UMzwandile walidubula entanyeni nasesifubeni bathatha isibhamu salo, balishiya kanjalo. Baqhubeka behamba bebamba inkunzi besesebenzisa nesibhamu salo. Amafoni abawathatha kuleli phoyisa bawadayisa.
Unkosikazi wephoyisa, uNksz Thandi Mthembu uthe,
“Izingane zami eneminyaka engu-10 neneminyaka eyisikhombisa zithwele kanzima zihlezi zibuza uyise. Indodakazi yami eneminyaka eyisikhombisa ngithola izincwadi kuthisha wayo ziveza ukuthi ayisakwazi ukufunda, ihlale izithulele. Umfana ona-10 uhlezi ekhala ethi ngabe usaphila uyise ukube wayengalona iphoyisa,” kusho uNksz Mthembu.
Uthe uphila ngokusaba ngenxa yokuthi abantu ababulala obezoba umyeni wakhe bahlala eFolweni.
Uthe izinhlelo zonke ababenazo nomyeni wakhe zokwakha nokunika imfundo engcono izingane zabo zonke zishabalele okwamazolo ebona ilanga.
Leli cala lisheshe lagoqwa ngenxa yokuzimisela kwabaphenyi baseKing Shaka Airport oDetective Mbuso Mhlangu noVick Thaith. Icala beliphethwe abaphenyi boKlebe, oCaptain Felix Mpangase noLunga Mbhele.