Kumi ngononina ngengqungquthela
KUMI ngomumo ngamalungiselelo engqungquthela ye-ANC eqala kusasa, eNasrec.
Izolo, uNobhala Jikelele we-ANC uMnuz Gwede Mantashe, uthe konke kuhamba kahle njengoba beqale ngokuhlola indawo okuzokwenzelwa kuyo ingqungquthela bathola ukuthi sekulindwe izithunywa.
Uveze ukuthi namhlanje izithunywa ezivela ezifundazweni eziyisishiyagalolunye ze-ANC zizobhalisa eNyuvesi yaseJohannesburg bese kuba nomcimbi wesidlo sasebusuku lapho kunamatafula asuke ekhokhelwe oR500 000.
Kusasa kulindeleke ukuthi uMengameli Jacob Zuma avule ngokusemthethweni ingqungquthela emva komkhuleko.
Emva kwakhe uMantashe uzokwethula umbiko wenhlangano, achaze nokuthi banezithunywa ezingaki, isifundazwe ngasinye sinabantu abangaki abavotayo nokunye.
NgeSonto kulindeleke ukuthi kudingidwe umbiko kaMantashe bese kuxoxwa ezivukayo njengokuthi i-ANC kufanele yini ibe namaphini kamengameli amabili bese kuchazelwa abantu imithetho yokuvota.
Kuzobe sekuphakanyiswa amagama abazovotelwa kwesokwengamela i-ANC, kuyenzeka abantu baphakanyiswe ngalelo langa noma amagama abo engekho ohlwini njengoba amalungu enelungelo lokuphakamisa umuntu amthandayo. Kuyobe sekuvotelwa umengameli, emuva kwalokho kumenyezelwe onqobile bese kuvotelwa ezinye izikhundla zobuholi obuphezulu okubalwa esephini likamengameli, unobhala, iphini likanobhala nomgcinimafa.
NgoMsombuluko kuzomenyezelwa sonke isigungu sobuholi obuphezulu bese kudingidwa imigomo ye-ANC nezihloko ezibalulekile okubalwa imfundo yamahhala, umhlaba, i-national health insurance nokunye. Lezi zigungu zizobe zidingida lokhu esithe njengoba izintatheli zizobe zingavumelekile lapho zizobe zidingida khona ngalezi zinto.
NgoLwesibili kuzobe sekwenziwa iziphakamiso ngezihloko ebezixoxwa ngoMsombuluko bese kwaziswa abezindaba ngazo.
NgoLwesithathu okuwusuku lokugcina lwengqungquthela kuzokhulunywa ngenqubomgomo eyenziwe emuva kweziphakamiso bese kubikelwa izintatheli ngokudingidiwe. Emva kwalokho ingqungquthela izovalwa ngumengameli omusha we-ANC.