Kuyaphela ukuqagela ngozohola uKhongolose
ABAHLAZIYI bepolitiki balindele ukuthi iqale ngomdonsiswano ingqungquthela ka-54 ye-ANC eqala kusasa eNasrec, eGoli.
Umbango wesikhundla sokwengamela i-ANC uphakathi kukaDkt Nkosazana Dlamini Zuma noMnuz Cyril Ramaphosa.
Umhlaziyi wepolitiki, uMnuz Thabani Khumalo uthe namhlanje kulindeleke ukuthi amalungu e-ANC abhalise eNyuvesi yaseJohannesburg lapho kuzoba nomdonsiswano wokuthi bangaki abantu abavunyelwe ukungena engqungqutheleni.
“Amalungu e-ANC avamise ngokukhala ngokuvalelwa ngaphandle ezingqungqutheleni, bekunezikhalo ngokuthi ezinye izifundazwe zinikwe izihlalo ezincane ngakho silindele umdonsiswano,” kusho uKhumalo.
Amazwi akhe enanelwe nguMnuz Daniel Silke naye ongumhlaziyi othe kuzoba nomdonsiswano ngenxa yezingqinamba eziningi kwiANC kusukela emagatsheni kuya ebuholini bezifundazwe.
USilke uthe kufanele ukuthi umongo wengqungquthela ube wukudingida imigomo abale kuyo udaba lomhlaba, olokuthuthukisa umnotho, imfundo yamahhala nokunye kodwa sekuguqukile njengoba wonke umuntu esefuna ukwazi ukuthi kuzonqoba bani.
Ebuzwa uKhumalo ukuthi ngabe kuzohamba kanjani okhethweni phakathi kukaMnuz Cyril Ramaphosa noDkt Nkosazana Dlamini Zuma uthe kunzima ukuqagula lokho, kufanele kulindwe imiphumela. “Esingakusho wukuthi umkhankaso kaRamaphosa ubugxile ezihlokweni iningi labantu baseNingizimu Afrika abathanda ukuzizwa engibala kuzo ukulwa nenkohlakalo, ukudala amathuba omsebenzi, ukulungisa isimo ezinkampanini zikahulumeni nokunye. “Lokhu kumakhele ugazi kubantu baseNingizimu Afrika futhi kungayisiza ne-ANC uma sekuyiwa okhethweni luka-2019,
“Kolunye uhlangothi uDkt Nkosazana Dlamini Zuma ubekhankasa ngokwenza uguquko olunqala kwezomnotho (radical economic transformation) okuyinto okuphikiswana ngayo ngaphakathi kwi-ANC.
“Abatshalizimali kabahambisani nalolu hlelo. Kuzodingeka asebenze kanzima uma ezobuyisa isithunzi se-ANC ngo-2019,” kusho uKhumalo.
USilke uthe noma ngubani ozophumelela phakathi kukaRamaphosa noDkt Dlamini Zuma kufanele athole amavoti amaningi ngoba uma ewine ngengcacamezela kungase kube nzima ukuthi abuse kahle.
Uveze ukuthi uRamaphosa ubonakala njengomuntu ozobuyisa isithunzi se-ANC ngezinto azishilo ngesikhathi ekhankasa futhi uma ephumelela umnotho ungathuthuka.
“Osomabhizinisi nabatshalizimali bazotshala imali uma kuwina uRamaphosa ngoba kucacile ukuthi ufuna ukudala amathuba omsebenzi alwe nenkohlakalo kuhulumeni nasezinkampanini ezizimele.
“Uma kuwina uDkt Dlamini Zuma abatshalizimali bazoqhubeka nokugodla imali yabo ngoba besaba uhlelo lokuguqulwa komnotho. Akucaci ukuthi izinhlelo zakhe ngomnotho zithini,” kusho uSilke.
Uthe akaboni ukuthi kuzoba nomuntu oqokwayo ukuthi abumbe i-ANC ngoba amagatsha awakuphakamisanga lokho, kuvele eMpumalanga kuphela.
Uphethe ngokuthi noma ngubani onqobayo kufanele asukumele izinkinga ze-ANC abale kuzo amacala, uqhekeko, acacise nokuthi kwenzekani ngoMengameli Jacob Zuma njengoba elokhu efakwa njalo ezinkantolo.
UKhumalo uthe maningi amathuba okuthi kube neqembu elisha emuva kwengqungquthela ye-ANC ngenxa yoqhekeko olukhona njengamanje.
“Inkinga enkulu wukuthi i-ANC ihlukene phakathi futhi nalo mqondo wokuthi onqobile uthatha konke akuzenzi lula izinto.
“Onqobayo uzoba nomsebenzi onzima wokubumba inhlangano kodwa ngeke sikubalekele ukuthi kungenzeka abahluliwe bakhe iqembu labo elisha.
“Kunobutha obukhulu njengamanje phakathi kwabaholi,” kusho uKhumalo.