Uchitha eyamavoti athengwayo
UDKT Nkosazana Dlamini Zuma uziphikisile izinsolo zokuthi abamesekayo sebeqalile ukugwazela izithunywa ze-ANC ukuze awine isikhundla sokwengamela le nhlangano ngeSonto.
Abantu bakaDkt Dlamini Zuma nabakaMnuz Cyril Ramaphosa basolana ngokugwazela abantu njengoba ukhetho luqala kusasa.
Ekhuluma emcimbini we-ANC Women’s League obuseKempton Park, ngoLwesithathu ebusuku, uDkt Dlamini Zuma uthe akekho umuntu othenga amavoti kulabo abamesekayo.
“Abantu bakhuluma ngendaba yokuthengwa kwamavoti nomgwazo. Asiyidingi leyo nto. Akekho umholi othenga amavoti ngoba ngeke umuntu ajabulele ukunqoba ngenxa yokuthengwa kwamavoti,” kusho uDkt Dlamini Zuma.
Uthe basebenze kanzima ukuheha izithunywa ze-ANC, behambela imiphakathi ehlukene ukuze baqokwe ngalokho abakushilo.
Ugqugquzele amalungu e-ANC ukuthi aqoke umholi ozothuthukisa izwe.
“Kufanele kuqokwe umholi ozobhekelela abampofu. Ozobumba i-ANC futhi aqinisekise ukuthi abantu bayangena emnothweni,” kusho uDkt Dlamini Zuma.
Uthe useqophe umlando njengoba engowesifazane wokuqala ukungenela ukhetho lokwengamela i-ANC eneminyaka engu-105 yabunjwa.
Ubonge ama-league e-ANC, uMkhonto weSizwe nomakadebona be-ANC ngokumeseka.
UDkt Dlamini Zuma wesekwa yizifundazwe ezinkulu okubalwa iKwaZuluNatal, iMpumalanga, i-ANC Women’s League, ANC Youth League uMkhonto weSizwe nomakadebona be-ANC.