Bayaveva ngezinyokanyoka eLamont
UYAVEVA umphakathi waseLamontville ngabahlala emijondolo yakule ndawo abasolwa ngokuxhuma ugesi wezinyokanyoka okuholela ekucisheni kowabo.
Umphakathi ohlala emgwaqweni uSomshuku, uthi alipheli isonto ugesi ukhanya kule ndawo ngenxa yezintambo zezinyokanyoka ezixhunywe ezigxotsheni kulo mgwaqo.
Umphakathi uthi usuke wazama ukunqanda lo mkhuba ngokuthi unqamule izintambo kodwa zibuye zixhunywe.
UNksz Sibongile Mtshali oyilungu lomphakathi uthe: “Asinalo ulwazi ngogesi kodwa ukucisha kwawo kuyasicasula ngoba kubolisa ukudla kwethu. Kuphela izinsuku eziningi silinde ukuthi kulungiswe isigubhu, okuthiwa siyasindwa. Sesike saya nasemahhovisi kagesi siyocela ukuthi okungenani sibuyisele nganeno isigxobo, ukuze sisigade. Abasebenzi bakwamasipala abafikayo bathi abanawo amandla okwenza lokho,” kusho uNksz Mtshali.
Esinye isakhamuzi esingathandanga ukudalulwa sithe abahlala emjondolo sebeke babasabisa ngoba bebize abakwamasipala. Sithe izimpahla zikagesi abazisebenzisayo ziyalimala.
“Kamuva nje siye kumphathi wehhovisi likagesi e-Unit 10 nase-Unit 6 eChartsworth. Kwathiwa akungene abantu ababili kube yibo abazochaza udaba. Sebeluchazile kwathiwa akulula ukuthi kwenziwe ushintsho kugesi wethu ngoba thina sibhekelelwe yisifundazwe. Asazi ukuthi lokhu kusho ukuthini ngoba ugesi siwuthenga kwamasipala kodwa uma sinenkinga kuthiwa kumele ilungiswe yisifundazwe,” kusho isakhamuzi.
UNksz Tozi Mthethwa, okhulumela uMasipala weTheku, uthe umasipala ubhekene nengwadla yabantshontsha ugesi nezintambo zawo ezindaweni eziningi.
“Siyazama ukutshintsha izintambo sifake ezinye okungelula ukuthi zintshontshwe kodwa kuyabiza. Asikwazi ukuzishintsha zonke ngesikhathi esisodwa. Ngasohlangothini lokufakela abahlala emijondolo ugesi nakhona sinezingqinamba zokuthi eminye imijondolo yakhiwe emhlabeni onabanikazi bawo.”