Omaskanda bakhuze udlame emahostela
KUKHUZWE isihlava sokubulalana emahostela aseThekwini ngesikhathi kunedili lomculo kamaskandi wokukhuza ukuchitheka kwegazi, ePeople’s Park, eMoses Mabhida eThekwini ngoLwesithathu.
Indlela abantu abagcwale ngayo kulo mcimbi ubungafunga ukuthi yimpelasonto.
Umcimbi uqale ekuseni waze waphela ngabo-10 ebusuku. Ivukane uFalabo ligile izimanga liguqisa izihlabani zalo mculo ngokuthakaselwa kakhulu yizihlwele laze lacelwa impinda.
Abaculi abaningi bakhuze ukubulalana kwabahlali basemahostela, bathi uma abantu beqedana kusho ukuthi nabo bazogcina bengasenabo abalandeli. NeMeya yaseThekwini, uNkk Zandile Gumede ikuhlabile ukubhuqabhuqana kwabantu basemahostela ngenhlamvu.
Igcokama Elisha yilo elivale inkundla kubaculi abebekhona okubalwa kubo uMjikijelwa, Khuzani, Amageza Amahle, Izingqongqo (okunguMfiliseni noJaiva Zimnike), Qhoshangokwenzakwakhe, Phuzekhemisi, Uglama Kamaskandi, Buselaphi, Njoko, Abafana BakaMgqumeni, Mgojeli, Izelamani, Bahubhe, Ithwasa Lekhansela, Mbuzeni Mkhize, Dlubheke, Malahle, Ngelo V, Izintombi Zomndeni, Gadla Nxumalo, Imfezemnyama, Osukasambe, uMaNgcobo nabanye.
Uhlelo lwalo mcimbi beluphethwe abasakazi boKhozi FM uNgizwe Mchunu, Beekay Mchunu noNkosinathi Mshengu, uMfanuphetheni Zulu weRadio DUT noMC Pholobas weZwi Lomzansi.
Okuphawulekile ukuthi nakuba abaculi abaningi bebecula izingoma zobunsizwa kodwa uMalahle usukumise izihlwele ngengoma yakhe ekhuza impi KwaMashu esihloko sithi Umhlaba Wonke UMashu Udume Kabi kanti noDlubheke uzichazile ngenoni lakhe elithi Impi Yamatekisi.
Yize bekusina kudedelana abaculi bakamaskandi kodwa nomculi wombhaqanga uVusi Ngcobo obedansela amaSoul Brothers akasalanga ngaphandle.
Umculi oseyivukane weGqom’ uNuz Queen ushayise abathandi bomculo kamaskandi ivosho ngengoma yakhe entsha ethi Yayithini Indidane.
NoCevuzile usukumise nesinedolo esedlala ingoma ethengwa ubuthaphuthaphu kuma-i-Tunes ayenze noDJ Tira noTipcee ethi Umalume Uyalumana.