Ukhala ngesihluku umndeni wobulewe
UMNDENI wowesilisa oneminyaka engu23 waseLamontville odutshulwe ngamaphoyisa ukhala ngesihluku abulawe ngaso ezihambela emgwaqweni.
UMnuz Mfanafuthi “Mtatasi” Chiliza (23) kuthiwa ubulawe ngoLwesithathu emini, isidumbu sakhe satholwa emafulethini aseLamontville.
Umufi kuthiwa ubehamba emgwaqweni ngesikhathi edutshulwa, wabaleka wangena endlini yomuntu, washonela kubhavu wokugeza.
Umzala wakhe, uNksz Thabisile Chiliza uthe bahlukumezekile befika endaweni yesigameko betshelwa amaphoyisa ukuthi uMfanafuthi udubuleke onyaweni kuphela kodwa babona sekufika imoto elanda izidumbu.
“Sihlukumezekile ngendlela amaphoyisa abulale ngayo umzala wami obezihambela emgwaqweni, ngaphezu kwalokho uma sifika endaweni yesigameko asinqabela ukuba singene lapho abedutshulwe khona. Saqanjelwa amanga kwathiwa udubuleke onyaweni, uzosinda, ngakho uzolinda i-ambulensi. I-ambulensi ifike yazimela sabona sekufika imoto yezidumbu. Kusihlukumeze kakhulu ngoba asitshelwanga ukuthi wenzeni aze abulawe ngesihluku esingaka,” kusho uNksz Chiliza.
Okhulumela amaphoyisa KwaZulu-Natal, uCaptain Nqobile Gwala ukuqinisekisile ukuthi amaphoyisa adubule umsolwa obefunwa uthuli.
“Amaphoyisa athole ulwazi ngomsolwa owaziwa ngoMtatasi obefunwa amaphoyisa aseLamontville ngenqwaba yamacala okugqekeza nokubamba inkunzi amabhizinisi. UMtatasi ubonakale ehamba emgwaqweni uSihlahla, ubalekile ebona amaphoyisa. Amjahile amaphoyisa ahamba ngezinyawo.
UMtatasi uphele emehlweni, uqhamuke ngemuva kwephoyisa ezama ukuliphuca isibhamu, iphoyisa likwazile ukuvikela isibhamu, labe selidubula libhekise ngakumsolwa. Umsolwa utholwe esecashe kwelinye lamafulethi eLamontville. Uyiswe esibhedlela, washonela khona,” kusho uGwala.
Umndeni ukuphikile ukuthi umsolwa ushonele esibhedlela.
“Obekusikhalisa ukuthi silinde kusukela ngo-11 ekuseni ukuba ahlengwe abezimo eziphuthumayo kodwa uze walandwa imoto yezidumbu ngo-2 ntambama. Lesi senzo samaphoyisa sisihlukumezile njengomndeni,” kusho uNksz Chiliza.
Umndeni uveze ukuthi bekukhona namalungu amadala omndeni, ogogo bakamufi abebelokhu becela ukubona lapho elinyazwe khona kodwa amaphoyisa engavumi.
UGwala uthe alikho iphoyisa elilimele kulesi sigameko. Uthe kuvulwe icala lokuzama ukubamba inkunzi nedokodo ngokushona komuntu esitesini sase-Lamontville, uphenyo ngesigameko lusaqhubeka.