Imizila izophazamiseka yizikhukhula
UMONAKALO owadalwa yizikhukhula ngo-Okthoba uzophazamisa abagibeli bezitimela ogwini oluseNingizimu neKwaZulu-Natal, abazosala dengwane kusukela kusasa.
AbakwaMetrorail bamemezele ukuthi uzovalwa isikhathi esingaziwa umzila ophakathi kweManzimtoti neReunion kusukela kusasa. Isitatimende esithunyelelwe Isolezwe siveza ukuthi yize abakwaMetrorail bezamile ukulungisa eminye imizila eyakhahlanyezwa izikhukhula, kube nzima ukulungisa lona ozovalwa.
UNkk Isabel Westhuizen okhulumela abakwaMetrorail esifundazweni, uthe isimo sibheda kakhulu emzileni ophakathi kweReunion neManzimtoti ngenxa yomonakalo wezikhukhula.
“Lo mzila awukaze ubuyele esimeni njengoba wagugulwa amanzi, kwasala ezinye izingcucu ezapheshulwa umoya zilenga emoyeni phezu kukajantshi. Ngesikhathi kunezikhukhula zintathu izitimela zethu ezakhahlamezeka eManzimtoti, kwadingeka sisebenzise ezinye izindlela zokuthutha. Inkinga kube ukuthi izitimela ezikhona azikwazi ukudlulela edepho yethu eseThekwini ukuze ziyokhandwa ngokuphelele ngoba bekudingeka zithuthe abagibeli. Zintathu kuphela ebezisebenza, nazo ebezingasekho esimeni sokusebenza,” echaza.
Uthe bese bevele besihoxisile isitimela esisodwa kulezi ebezisebenza, kwasala ezimbili. Nazo lezi ezimbili uthe azisekho esimeni njengoba zingakaze zilungiswe ngokuphelele.
“Bekunzima ukuthatha isinqumo sokuvala umzila kodwa sikwenze lokhu ukuphephisa abasebenzi bethu nabagibeli. Izibalo zabagibeli bethu bese zehlile ngenxa yokushoda kwezitimela, obekusilimaza nathi ekubhekaneni nezindleko. Sibazisile abagibeli ngezinselelo ebesinazo kusukela ngo-Okthoba, namanje sizobazisa ngezinguquko ezintsha,” kusho uNkk Westhuizen.
Uthe yize bengakazi ukuthi lo mzila uzovulwa nini kodwa ukulungiswa kwawo kulindeleke kuqedwe ngoJanuwari.
Uveze ukuthi iziteshi zizovalwa futhi akukho mathikithi azodayiswa. Kunxuswa abagibeli ukuthi basebenzise ezinye izindlela zokuthutha ngoba abakwaMetrorail awekho amabhasi abazowathumela.
Kunxuswa nokuthi abagibeli babekezele, bangacekeli phansi iziteshi nempahla ngesikhathi kusavaliwe.
Kulabo abebethenge amathikithi enyanga kaDisemba kuthiwa kumele bawagcine ngoba kuzomenyezelwa ukuthi bazonxeshezelwa kanjani.
Izikhukhula ezithathe izinsuku ezimbili ngo-Okthoba 10 no-11 zashiya kukhalwa esifundazweni, kwaphazamiseka nokusebenza kwezitimela. Eminye imizila yavalwa izinsukwana ngesikhathi kusalungiswa umonakalo.