Kujutshwe onjiniyela emhlabeni onyakazayo
KUZOCACA ngonyaka ozayo ukuthi uzanyazanyiswa yini umhlaba eRoad 2, eMalukazi njengoba iMeya yeTheku uNkk Zandile Gumede isijube ithimba lonjiniyela nabahlola umhlaba (geologist) ukuba liyohlola isimo.
Lezi zindaba zivele izolo ngesikhathi Isolezwe lithola ucingo ethimbeni lonjiniyela bakaMasipala weTheku befuna ikheli lokuya eMalukazi.
UNkk Gumede uthe bengumasipala onakekelayo, basukumela phezulu uma abantu baseThekwini behleli lubhojozi.
UNkk Nokukhanya Dhlomo oyilungu lekomiti eMalukazi eRoad 2, ubonge Isolezwe ngokubika ngodaba lwabo njengoba ethe sekufike amakhansela endawo ezohlola isimo ehambisana nabezimo zezinhlekelele.
“Sibonga Isolezwe ngokusukumela udaba lwethu ngoba umasipala uthumele ithimba lezezinhlekelele elifike lazohlola okwenzekayo. Kufike nabophiko lwezamanzi bathinta umhlaba oshonaphansi uma sinyathela. Ikhansela elibizwa nge-propotional representative (PR) lifikile nalo ukuzosihlola. Sisalinde ithimba lonjiniyela nama-geologist okuthiwe bazofika maduze,” kusho uNkk Dhlomo.
Uthe okwamanje basahleli yize umhlaba ushona phansi uma benyathela.
“Uyaqhubeka nokuqhekeka umhlaba nokushona phansi uma sinyathela. Sihleli ngoba asinayo enye indawo esingakhosela kuyona njengoba isimo sinjena,” kusho uNkk Dhlomo.
Yize ama-geologist engakawenzi umbiko kodwa athe obekwenzeka eMalukazi akusikona ukuzamazama komhlaba kodwa kuzocaca emuva kophenyo lwawo ukuthi ushoniswa yini phansi umhlaba.