Usewethulile owokuvumbulula ithalente kwabacula owokholo
USAZOKWANDA umculo wokholo nowesintu ezindaweni zobumnandi eNingizimu Afrika.
Lona ngumbono kamakadebona kwezomculo uLindelani Mkhize (osesithombeni) ongomunye wabasunguli beqembu elicula owokholo iJoyous Celebration.
UMkhize uphawula kanjena nje ezindaweni eziningi oDJ abasayishiyi ngaphandle ingoma yeqembu lakhe okucula phambili kuyo uKhaya Mthethwa ethi I-Beat (Msindisi / Ithemba Lami).
UMkhize ubekhuluma naleli phephandaba eMoses Mabhida Stadium lapho ebethula khona umcimbi wakhe i-Ignite.
Lo mcimbi, oqale ngonyaka odlule, ngawo uhlose ukuvumbulula ithalente elisha. Abaculi abafuna ukuba yingxenye yawo bathumela ama-video abo becula bese kuqokwa abanethalente. “Ngasebenzela izinkampani ezinkulu futhi ngavumbulula abaculi abadumile. Kuwubizo kimi ukuvumbulula ithalente elisha. Kufana nokuthola idayimane bese uyalipholisha ukuze licwebezele,” kusho uMkhize. Uthe abaculi ubafundisa izinto eziningi njengendlela efanele yokubamba i-microphone, ukucula nebhendi nokunye. “Ngomunye unyaka ngigubha usuku lwami lokuzalwa kukhona abathi angihlanganise abaculi engasebenza nabo ngenze umcimbi omkhulu. Ngathi kungcono ukufuna abaculi abasha ngibanikeze inkundla yokuzibonakalisa,” kusho uMkhize. Ubale uNeliswa Sibiya waseSikhaleni njengomunye wabavumbulula. Ingoma yakhe ethi Mama KaBafana izwakala emdlalweni iLockdown. Uthe kwi-Ignite umculo ushetshwa nengqephu, ukudla neziphuzo. Lo mcimbi uzoba seMoses Mabhida Stadium ngoDisemba 22. Amathikithi aqala kuR290 eComputicket.