Ungabalwa nabadale izingozi zomgwaqo
MHLELI: Ngithi angithathe leli thuba ngilisebenzise ngidlulise umyalezo wami kubantu besifundazwe sethu KwaZuluNatal ngalesi sikhathi samaholidi kaDisemba lapho umuntu nomuntu ezitshela khona ukuthi unemali noma engenayo, ebona nje la masentana ekade ewalondoloza unyaka wonke.
Sekujwayelekile njalo ngalesi sikhathi senze izinto ezingenasidingo sisebenzise imali ngokweqile. Kukhona into engiphatha kabi leyo yokuthi njalo ukwenzeka kwezinto ikakhulu ezimbi KwaZulu-Natal kuthiwe iyona ehamba phambili, isibonelo yizingozi emigwaqweni negculazi. Nginxusa kuwo wonke umuntu ikakhulu abashayeli bezimoto baziphathe ngendlela babe nokubekezelelana.
Ngicela sihloniphe imithetho yomgwaqo. Ngala maholidi isimo sezulu sithanda ukuba sibi, kufuneka ukushayela kwakho kuhambisane nesimo sezulu. Ngiphinde ngicele kubafowethu abashayela amatekisi namabhasi ukuthi impilo yabantu ibaluleke ngaphezulu kwemali. Imoto nemoto kumele ibe sesimeni esifanele ukuba semgwaqweni.
Ungayiphoqi noma uyizwa ukuthi ayikho kahle, umshayeli nomshayeli akakuthandazele ukuthi kungenzeki kuye abalwe kwabadale izingozi kwafa abantu.
Ngiyacela kubafowethu abanezimoto abathanda ubumnandi, ukuthi uma usuphuzile nikeza omunye ongaphuzanga ashayele.
Nathi esihamba ngemoto eyodwa masingavumi ukushayelelwa umuntu odakiwe. Ngisho noma kuthiwa ngeyakhe akahlale eceleni ngoba nizofa nonke.
Ngifuna ukuxwayisa abafowethu owesilisa noma owesifazane, thatha wonke umuntu njengonegciwane lengculazi ukuze uzivikele.
Ubhasobhe angadluli nawe la maholidi, ungene noma uqale u-2018 usunengcindezi. Njabulo umfo kaGebashe