Uthembisa into yamehlo ngomdlalo omusha
UTHEMBISA lukhulu omunye wababhali bomdlalo omusha ozoqala ngoJanuwari kuMzansi Magic (161) ngeSonto ngo-8 ebusuku othi Nkulukeko.
USibulele SikoShosha uthe kuyamjabulisa ukuthi lo mdlalo uqoshelwe eKhayelitsha, eKapa, okuyilapho ekhulele khona ngoba imidlalo eminingi kuleli iqoshelwa eGauteng naseThekwini.
Uthe kulo mdlalo kuzobonakala impilo ehlukene ephilwa abantu bakuleli lokishi eliseKapa. “Lo mdlalo ungomunye esiziqhenya kakhulu ngayo. Ukhuluma ngempilo yamanje ephilwa nsuku zonke emalokishini akuleli,” kusho uSibulele. Uthe ithuba abalinikwe wuMzansi Magic lokukhombisa lo mdlalo lisho lukhulu kubo. “Iphupho lami bekungukukhombisa ithalente elisha elizobonakala kulo mdlalo lixoxa ngesikubhalile. Siyabonga ngokusebenzisana okuhle neBomb Pictures sihlanganisa lo mdlalo,” kuchaza yena.
Lo mdlalo uthe ukhuluma ngensizwa esencane uNkululeko Zwai (Aphiwe Mkefe), ohamba phambili ezifundweni zezibalo.
Uthe ma uqala kuzobonakala uNkululeko elungiselela umncintiswano ongashintsha impilo yakhe uma engadla umhlanganiso.
“Uma ethatha isinqumo sokuthandana nothile, ngokushesha uzithola esenkingeni enkulu. Konke akusebenzele kanzima kuyashabalala futhi kubeka engcupheni ikusasa lakhe,” kusho uSibulele.
Uthe yilapho kuvela khona intokazi esizakhele igama emdlalweni Isithembiso, uZiyanda Nyoka olingisa indawo kaSibulele “Sibu” Nginda.
“Uyindodakazi yephoyisa elidumile eKhayelitsha. USibu uhlakaniphile, uzimele kanti ukuthandana kwabo kancane kancane kwenza izinto zishintshe empilweni yabo,” kuchaza yena.
Kulo mdlalo oneziqephu ezingu-13 kuzobuye kubonakale nabanye abalingisi abaziwayo okubalwa kubo uTina Jaxa, Abongile Matsai, Andile Mxakaza, Jet Novuka, Tiisetso Thoka no-Abongile Salli.