Ube yimpumelelo u-2017 kwezokusubatha eMzansi
LONA kube ngeminye yeminyaka eyohlale ikhumbuleka kwezokusubatha kuleli njengoba abagijimi baseNingizimu Afrika beqhubekile nokugila izimanga ezingeni lomhlaba.
Imidlalo ye-IAAF Diamond League isifana nekhaya kubadlali abanjengoCaster Semenya noLuvo Manyonga abadle umhlanganiso kuyona. Nakwi-IAAF World Championship ebiseLondon bakwazile ukwenyusa isibalo sezindondo ngenxa yamagalelo abo.
Ngokwenza kahle kumaWorld Champs inhlangano eyengamele ezokugiijima eNingizimu Afrika, i-Athletics South Africa (ASA) isanda kukhipha imihlomulo ezotholwa abadlali abathole izindondo kule midlalo.
Igolide lihamba noR150 000, isiliva uR100 000 kuthi ithusi kube uR80 000.
n Ukubuyekeza okuhle okwenzekile kwezejubane singabheka nokuqopha umlando kukaBong’musa Mthembu ongene emabhukwini amakhulu ngokuba umgijimi wokuqala omnyama waseNingizimu Afrika ukunqoba iComrades Marathon kabili. UMthembu nguyena owadla umhlanganiso ngo-2014 njengoba ebesephinda nonyaka.
Akwenzile kwakugcine ngenkakha uBruce Fordyce ngo-1990. KwiTwo Oceans Marathon kufezeke iphupho kuLungile Gongqa enqoba, waba ngowokuqala waseKapa ukudla umhlanganiso kusukela ngo-1973.
NakwiSoweto Marathon kuqopheke umlando kunqoba u-Irvette van Zyl eba ngowokuqala wesifazane wakuleli ukuphumelela kusukela ngo-2009.
Umjaho wabesifazane iSpar Grand Prix, kulokhu umhlanganiso udliwe uKesa Moletsane waseFree State University edlisela ogageni uVan Zyl.
n UManyonga usonge unyaka wakhe ngokuba yiSportman of the Year neSports Star of the Year kumaSA Sports Awards.
Lo mdlali we-long jump nguyena ogxume ibanga elide kulo nyaka elingu-8.65m elimbeka eqhulwini ekuklelisweni kwiIAAF kulo nyaka. Leli banga yilona elimnikeze irekhodi elisha laseNingizimu Afrika.
UManyonga uzihlomulele ngezigidi eba ngumpetha weDiamond League. Ifomu yakhe idlulele kumaWorld Champs lapho ebuye negolide kwi-long jump ngebanga elingu-8.48m.
n USemenya uqhubekile nokukhonya ebangeni lika-800m kwabesifazane enqoba iDiamond League waphinda wathola igolide kumaWorld Champs engakaze ahlulwe kulo nyaka.
Kuleli uhlonishwe ngomklomelo weSport woman of the Year. Le ntokazi iphinde yaziveza ukuthi ayigabile ngebanga elilodwa isebenza kanzima ukutholela iNingizimu Afrika indondo yethusi kwi-1500m eLondon.
n UWayde van Niekerk uvikele ngempumelelo isicoco sakhe somhlaba kwi-400m enqoba eLondon. Uphinde wahlabana ngendondo yesiliva ku-200m kuwona lo mqhudelwano. Lo mgijimi ubuye wabeka isikhathi okuyisona esisheshayo esake sagijinywa kwi-300m eqopha u-30.81 yize esewuvale ngebohlololo lokuyohlinzwa edolweni okusho ukuthi ngeke abekhona kumaWorld Indoor aseBirmingham, e-England ngonyaka ozayo.
n U-Akani Simbine uyibekile induke ebandla eqopha isikhathi esisheshayo
u-9.93 ku-100m emqhudelwaneni owawusekuqaleni konyaka ePretoria.
n URuswahl Samaai ubuye nethusi kwi-long jump.
n Bekungesiwona unyaka wamasiniya kuphela negenge encane izikhombisile ukuthi izimisele ngokuthatha izintambo uma abadala sebephelelwe yisikhathi.
Iqembu laseNingizimu Afrika ligile izimanga kwi-IAAF Under 18 World Championship ebiseNairobi, eKenya, libuya liqhwakele ngezindondo ezingu-11, amagolide amahlanu, amasiliva namathusi okuthathu.
Phakathi kwabadlali abagqamile kukhona uRetshidisitswe Mlenga othole igolide kwi-200m kwathi uTshenolo Lemao wabuya negolide kwi-100m. USokwakhana Zazini yena ube yingqwele kwi-400mH waphinde wahlonishwa ngeNewcomer of the Year kuleli.
Kulo mqhudelwano uBreyton Poole owenza i-high jump uzidonsele amehlo omhlaba eqa eyofinyelela ku-2.24m obuphindwe kabili ebudeni bakhe wabuya negolide.
n ULebogang Shange waseSoweto ngeke asale ngaphandle kwababe nonyaka omuhle. Ngemuva kokuqeda endaweni yesine kwiRace Walking ebangeni lika-20km, uqophe irekhodi elisha lakuleli enqoba eChina kwi-10km ngo-39.48.
n UStephen Mokoka unqobe isicoco sakhe sesine neShanghai Marathon (42,2km), eChina. Ubengumgijimi wokuqala ukunqoba lo mjaho amahlandla amane.