Indumezulu yezimpi okokuqala
UKHATHAZWA eyokufudukela kwezinye izifundazwe kwamabhokisa aKwaZulu-Natal uphromotha omusha, uThulani “3 Seconds” Nkwanyana, ohlele indumezulu yezimpi zesigaba esikhokhelayo ezizoba seMpangeni kusasa.
UNkwanyana, owayengumshayisibhakela eminyakeni edlule, uyinyanga edumile yaseMevamhlophe, eMpangeni, lapho ebuye aqeqeshe khona amabhokisa.
Izimpi ezihlelwe yi-3 Seconds Boxing Promotions zizoqala ngo-10 ekuseni eSanlam Centre Arena.
Kubashayisibhakela abaphuma esandleni sikaNkwanyana kukhona u-Innocent “Tycoon” Mantengu, Siboniso “Tiger” Gonya noSizwe Mthembu osengumqeqeshi. Esigabeni sama-amesha ushaya ngoMduduzi “Sgora” Mzimela osebuthe inqwaba yezindondo zegolide emiqhudelwaneni kazwelonke.
“Bekungikhathaza ukufuduka kwabashayisibhakela baKwaZuluNatal baye eGoli noma e-Eastern Cape bayofuna amadlelo aluhlaza khona ngoba kungekho okwenzekayo lapha. Lokhu bekudalwa ukungabi khona kophromotha abaningi ekubeni amabhokisa emaningi,” kusho uNkwanyana.
“Kungokokuqala lapha eMpangeni ukuthi kube nezimpi zesigaba esikhokhelayo. Ngiyethemba ukuthi lokhu kuzowakhuthaza amabhokisa. Ukuba nophromotha oyedwa bekugcina kwenze amabhokisa amzonde ngoba ebona ukuthi ukhetha iphela emasini. Kodwa kungenxa yokuthi maningi amabhokisa kulesi sifundazwe.”
Kubashayisibhakela baseKZN abafudukele kwezinye izifundazwe kukhona umpetha weSA cruiserweight uThabiso “The Rock” Mchunu osezinze eGauteng esitebeleni sezelamani zakwaSmith, iSmith’s Gym. Omunye nguMoruti “Babyface” Mthalane obengumpetha we-International Boxing Organisation (IBO) flyweight osejimini kaColin “Nomakanjani” Nathan, iBronx Gym eseGauteng. Eminyakeni edlule, owayengumpetha weSA lightweight, u-Irvin “Pretty Boy” Buhlalu ufudukele e-Eastern Cape esitebeleni sikaMzimasi Mnguni.
Kubashayisibhakela okulindeleke ukuthi basukumise abalandeli besibhakela eMpangeni kusasa kukhona uSiphiwesakhe “Piwe” Kunene oqeqeshwa nguXolani Malinga ogcine eshaye isibhakela esisezingeni eliphezulu e-Olive Convention Centre, eThekwini, emasontweni edlule. UKunene uzobhekana no-Odwa Duku waseGauteng empini yosuku.
UNkwanyana uthe kukhulu akuhlelayo ngesibhakela saseKZN okuzobonakala ngonyaka ozayo.
“Ngifuna ukuthi kube nebhande elizobizwa ngeBayede Championship elizolwelwa ngabashayibhakela balapha. Leli bhande lizovala isikhala sokuthi ibhokisa elisuke lingumpetha wesifundazwe alilitholi ibhande,” kuphetha uNkwanyana.