I-Arrows izimisele ‘ngokulwa’ neMaritzburg
IZIKHWEPHA noqina thambo yinto okumele ilindeleke emdlalweni wabakhaya baKwaZulu-Natal (KZN) phakathi kweLamontville Golden Arrows neMaritzburg United ngeSonto ngo-3.30 ntambama ePrincess Magogo Stadium, KwaMashu uma kuya ngamagama ensika yaBafana Bes’thende uMusa Bilankulu.
Njalo uma kuhlangene la maqembu kuba nezigigaba ezishiya izinkumbi zabathandi bawo bekhuluma ngemuva komdlalo.
NgokukaBilankulu, uma kufanele bayichukuluze ukuze ihluthukelwe izinhliziyo iMaritzburg, bazimisele ukwenza lokho inqobo nje uma kuzoqinisekisa ukuthi baqeda unyaka benamaphuzu angu-20.
Womabili la maqembu ayohlale ekhumbuleka ngoMandla Ncikazi oyiphini lomqeqeshi kwi-Arrows, no-Ernst Middendorp owayengumqeqeshi weTeam of Choice ababethi abafinyisane igazi ngo-2016.
Kulowo mdlalo uMiddendorp wathi ukhahlelwe uNcikazi ebusweni kodwa wakuphika lokho lo mqeqeshi we-Arrows.
Nokho abukho ubufakazi obuke bavela ngasohlangothini lukaMiddendorp ukuthi ushaywe ngonyawo ebusweni ngempela. Ngeke afihlwa futhi amahlebezi okuthi izikhulu zala maqembu, uMato Madlala noFarook Kadodia ziyinkukhu nempaka. Ahlale ekhona la mahlebezi kodwa uKadodia uyakuphika lokho kanti noMadlala uvele akuthathe ngensini uma ebuzwa lokho.
Akungabazeki ukuthi lo mdlalo uzobe ushubile futhi kuyethembisa ukuthi nakulokhu kukhona okuzokwenzeka kwazise laba bakhaya bahlangana nje babambene ngamaphuzu angu17.
“Besisebenza ngokwengqondo kakhulu THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. kuleli sonto kwazise sidlala kahle kodwa imiphumela iyaphika.
Umlando walo mdlalo usho ukuthi silindele izigemegeme. Uma kungukuthi kufanele sibachukuluze ukuze bezohluthuka baphazamiseke ezingqondweni, noma kanjani sizimisele ukukwenza lokho.
“Kusemqoka nokho ukukucacisa ukuthi konke kungenxa yomdlalo hhayi indaba yokungabhekani nangaphandle kwenkundla,” usho kanje uBilankulu izolo emini.
Uma kuzoya ngamagama kaPitso “Jingles” Mosimane weMamelodi Sundowns, i-Arrows izothwala kanzima ngoba iMaritzburg ayimakeki futhi ayihleleleki.
“Akukho ongakwenza ukubahlelela ngoba indlela abadlala ngayo ihluke kakhulu kunalokhu esikujwayele. Kufanele agawule abheke amaqembu azobhekana neqembu likaFadlu (Davids) ngoba azothwala kanzima,” kusho uMosimane.
U-Andile Fikizolo noDanny Phiri abadlali abaqinisekisiwe kwi-Arrows ukuthi ngeke badlale ngenxa yokulimala osekubahlalise isikhathi eside.