IBucs nomqansa wokuguqula umlando
I-ORLANDO Pirates ibhekene nomqansa wokuguqula irekhodi layo elibi uma ibhekene neFree State Stars ekuhambeni.
EZimnyama zizotholana phezulu neStars kusasa ngo-6 ntambama eGoble Park , eFree State emdlalweni we-Absa Premiership.
IPirates sekuphele iminyaka yagcina ukuwina ekuhambeni uma igadulisana neStars. Sekuphele amasizini ayisithupha ingawini kwiEa Lla Koto emidlalweni yeligi.
Ngesizini edlule ifike yakhala ngaphansi iStars inqoba ngo 3-2. Ngo2015/2016, iPirates ayizange ilibone elidlayo iFree State iyiqumba phansi ngo 1-0 wegoli lika-Ayanda Nkosi osegijima kweZimnyama.
Ngo-2014/2015, iBucs neFree State Stars badlale ngokulingana ngo 1-1 kwathi ngo-2013/2014 baphinda babambana ngo 1-1. Ngo-2012/2013, iStars inqobe ngo 1-0 wegoli likaNoah Chivutha.
IPirates ihlezi endaweni yesibili kwi-log ngamaphuzu angu-20. Emdlalweni odlule idlale ngokulingana ngo 1-1 naMaZulu e-Orlando Stadium, eSoweto, eGoli.
Ngakolunye uhlangothi iStars iguqiswe yiBloemfontein Celtic ngo 3-0 ngempelasonto edlule. Nokho ivuke yazithatha ngoLwesithathu eGoble Park ithela phansi iSuperSport United ngo 1-0 wegoli likaSiphelele Mthembu. Inyukele endaweni yesithupha ngamaphuzu angu-19.
UMthembu ibhola ubeligotshelwe ngobunono uPatrick Phungwayo ngakwesokunxele. Ngebhadi uPhungwayo ngeke akwazi ukudlala neqembu lakhe lakudala iPirates ngemuva kokuthola ikhadi elibomvu.
Umqeqeshi weStars, uLuc Eymael, uthe lokhu kumphathisa ikhanda njengoba kumele aqhamuke neqhinga elisha.
“Kumele ngiqhamuke nelinye isu ngoba uPhungwayo uzobe engekho okusho ukuthi ngeke akwazi ukubhekana neqembu lakhe lakudala. Kodwa kuwumsebenzi wami njengoba ngiwumqeqeshi ukuhlale ngiqhamuka namasu amasha,” kusho u-Eymael kwithelevishini.
Ngemuva kokukhishwa kukaPhungwayo, u-Eymael udonse uGoodman Dlamini obe umdlali ovelele, wafaka uKatlego Mashego emuva.
“Yize esebenzisa unyawo lwesokudla kodwa wenze kahle ngenxa yamava anawo,” kusho u-Eymael.
IPirates yagcina ukunqoba eFree State ngo-2010/2011 ngo 2-0 wamagoli kaTlou Segolela no-Andile “Gattuso” Jali.