INissan Patrol ibalwa neziphambili
UKUNGENISA kwezimoto ezinkulu kuleli kulokhe kuholele njalo ekutheni abakhiqizi bezimoto bangazitheli ngabandayo ekuletheni lezi zinhlobo zezimoto emakethe yaseNingizimu Afrika. Kulokhu sekutheleke enye yezimoto ebalwa neziphambili emhlabeni kumaSUV, iNissan Patrol.
Ngaphambi kokuthi ngikuxoxele ngayo, ngingasho nje ukuthi abaningi bakuleli bazoyifanisa nezimoto ezistshenziswa yizikhulu zikahulumeni uma zindiza emgwaqeni enguthelawayela kubhanyaza amalambu alihlaza okwesibhakabhaka. Uma uyifanisa, awugejanga, yiyo kanye.
Ngesikhathi siyivivinya le moto ngeledlule, into yokuqala eqaphelekile ngayo ukuvuleka kwayo ngaphakathi.
Uma uhlezi ngemuva uhlala wenabe engathi ukusofa wakho endlini, nangaphambili isikhala nokukhululeka kwesihlalo somshayeli siyancomeka. Phakathi kobuchwepheshe bale moto kukhona isibuko esibuka ngemuva okwazi ukuzikhethela ukuthi ufuna sibe yisibuko noma kube yi-screen esiveza okushuthwa yikhamera ngemuva. Okuhle ngokuthi usebenzise ikhamera ukuthi uma kunabantu abahlezi ezihlalweni zangemuva ngeke bakusithe. Okunye okungihlabe umxhwele ngayo i-Intelligent Emergency Braking.
Lobu buchwepheshe bukala ukusondela kwakho nemoto ephambi kwakho, uma isisondele kakhulu futhi ibona ukuthi kungadaleka ingozi, amabhreki azibambela wona ngaphandle kwakho ehlise isivinini semoto. Lobu buchwepheshe buhambisane ne-Foward Collision Warning, lapho imoto iqinisa khona ibhande lesihlalo, ikwazise ukuthi ususondele kakhulu nenye engaphambili kwakho, noma uma ibona ingozi.
Ngaphandle kwalokhu, obunye ubuchwepheshe obungithathile obe-Intelligence Lane Intevention. IPatrol ifunda olayini bomgwaqo iqinisekise ukuthi uhlala elayinini wakho. Uma kwenzeka uweqa ulayini wakho imoto iyangenelela i-steringi siyiqondise.
Njengoba ngike ngachaza ukuthi kuleli lezi zimoto zivame ukundiza emgwaqweni enguthelawayela uma zithwele izikhulu zikahulumeni, lokhu zikwenza ngenjini eyi-5.6 litre V8 kaphethroli. Ino-gearbox oyi-7speed automatic transmission.
Ukuyishayela wubukhosi ngenxa yalawa mandla isuspension yayo engaqinile, isteringi okuba ngathi siwufunda nawe umgwaqo namabhreki ayibamba kahle uma ijika ikhona.
Azikho ningi izimoto ezinkulu ezingakufakeli uvalo oluncane uma unyusa isivinini noma uyifaka obhuqwini. Esikhathini lapho abakhiqizi bezimoto asebeqale ngaso ukwakha izimoto zamaSUV ezingakwazi kahle hle ukushayela obhuqwini, abakwaNissan benze okuncomekayo ngePatrol ekunikeza ukuzethemba ngisho usobhuqwini.
Angiyena umuntu onamava atheni ekushayeleni obhuqwini kodwa ngesikathi ngiyivivinya, kwakungathi ngiwumshayeli omdala wasobhuqwini njengoba ikwazi ukuqwala izintaba, nokuhamba phezu kwamatshe kalula. Uma usobhuqwini inobuchwepheshe bamakhamera akwazi ukufunda konke okwenzeka eduzane nayo.
Kuleli kuzodayiswa iPatrol Premium kuphela eza nabo bonke ubuchwepheshe. Inani Nissan Patrol Premium R1 299 000
Ifika ne-warranty yeminyaka eyisithupha noma u-150 000km ngokunjalo neservice plan yeminyaka emithathu noma u-90 000 km.