Abezimoto benze kahle yize bekunzima
KUFANELE wukuthi zikutholile ukuphefumula izinkampani zezimoto njngoba ukuthengwa kwezimoto kunyuke izinyanga eziyisithupha kulandelana kuze kube yimanje.
Lokhu kwenzeke ngaphezu kokuthi alukho uzinzo kwesimo somnotho futhi nenani likaphethroli lilokhu linyukile.
Ukuthengwa kwezimoto kulekelelwe nawukuthi izinkampani zilokhu zizilethe njalo ezintsha.
Ukufika kwezintsha kuhambisana nokuhamba kwezindala njengoba kuvele ukuthi iGeneral Motors iyathutha eMzansi kanjalo nezithi kuyaphela ngeDodge.
Unyaka ka-2017 uphinde waletha injabulo kubathandi beBMW kwazise le nkampani yethule umbukiso wayo wokuqala ngqa iBMW M Festival eKyalami Racecourse, eGoli.
Umshayeli weToyota Gazoo Racing SA, uLeeroy Poulter, obevikela isicoco seSouth African National Rally and Cross-Country, umemezele ukuthi uyahoxa emncintiswaneni wakulo nyaka ngenxa yokuthi ufuna ukululama ngokugcwele njengoba wahlinzwa ebuchosheni ngonyaka odlule.
ULewis Hamilton, ongumshayeli weMercedes AMG Petrona, unqobe isicoco sakhe sesine emjahweni weFormula 1. Sekuwumlando ukuthi ngonyaka odlule kwanqoba owayenguzakwabo eqenjini uNico Rosberg owamemezele ukuthi usethatha umhlalaphansi.
Njengoba ngikubalulile ngenxa ukuthi ziningi izimoto ezethuliwe kulo nyaka, phakathi kwazo kukhona iBMW X3 ezokhiqizwa kuleli ngonyaka ozayo, Audi Q2, Toyota CH-R, Peugeot 3008, VW Golf GTD, Lexus LC 500 Coupe, Suzuku Ignis, Kia Rio, Land Rover Velar, nezinye.