Unyamalele umgadli we-Ajax ofunwa ngamanye
KUVELE ukuthi unyamalele umgadli we-Ajax Cape Town, uPrince Nxumalo, okuke kwabikwa ukuthi ufunwa uthuli ngamaqembu aseGauteng.
Izindaba zokuduka zivezwe umqeqeshi we-Ajax, uStanley Menzo, okusho ngaphandle kokunanaza ukuthi akamazi ukuthi ukuphi lo mgadli.
UMenzo ubekhuluma nabezindaba ngemuva komdlalo we-Absa Premiership lapho ezakhe zikhale ngaphansi kwiKaizer Chiefs ngo 1-0 eMoses Mabhida Stadium ngempelasonto.
“Ukukhuluma iqiniso ngoPrince, angimazi ukuthi ukuphi. Uyafika aphinde anyamalale usuku noma ezimbili. Namanje angazi ukuthi ukuphi. Ngizobona ngaye uma esenquma ukubuya. Angikwazi ukusebenza nomdlali onjalo,” kusho uMenzo ebonakala nasebusweni ukuthi uyanengeka.
UNxumalo kule sizini usashaye amagoli amabili emidlalweni yeligi. UMenzo uveza eyokunyamalala kwakhe nje, usanda kutshela abezindaba emasontweni edlule ukuthi lo mgadli odabuka eMlaza akazimiseli.
“Asikwazi ukuba nabadlali abasinika 60% noma 50%, bonke abadlali kufanele basinikeze 100%. Uma umdlali enza njalo siyamnika ithuba lokudlala. Kodwa uma kukhona osinikeza okungaphansi kusho ukuthi sinenkinga,” kusho uMenzo phambilini.
UNxumalo ufike kwi-Ajax kumasizini amabili edlule esuka kwiSuperSport United. Ufike wakhombisa izimpawu zokuvutha phambi kwamapali eqhulula amagoli phezu kokuxinwa yisifo sokuwa.
Leli qembu libe naye limeseka kuvela ukuthi limhambisa kodokotela okuyibona abagcine beyibonile inkinga yokuthi uphathwa yi-epilepsy.
Njengoba eseshaya eyokunyamalala umthombo osondelene naye uNxumalo, uhlebele Isolezwe ukuthi ucathanyelwa iMamelodi Sundowns neBidvest Wits.
NgoJanuwari amaqembu azobe esemkhankasweni wokusayinisa abadlali afisa ukuqinisa ngawo izikwati zawo.
Ngasohlangothini lwe-Ajax eyehlele endaweni ka-14 kwi-log, uMenzi uthe ikhona ingcindezi yokukhipha iqembu otakwini elikuyona. Uthe ufisa ukuletha abadlali abazokwenza umehluko eqenjini lakhe uma sekuvulwe iwindi.