UMosimane ukhala ngodonga
USALE ekhala ngokwenzelwa phansi ngabadlali basemuva umqeqeshi weMamelodi Sundowns, uPitso Mosimane, ezakhe zibuyiselwa kwamhlaba yiCape Town City emdlalweni we-Absa Premiership eLoftus Versfeld Stadium, ePitoli, ngoLwesibili ebusuku.
ISundowns ihlulwe ngo 1-0 wegoli likaNana AkosahBempah. Lokhu kusho ukuthi leli qembu lihlulekile ukuya emaholidini selivule igebe lamaphuzu ayisishiyagalolunye esicongweni se-log yePremiership.
Ngaphambi komdlalo wangoLwesibili AmaBrazilians abekade esewine imidlalo emine ilandelana nokwenze ahlala esicongweni avula negebe lamaphuzu.
Nakuba uMosimane ekwamukele ukuthi iSundowns isazohlulwa kweminye imidlalo kodwa ukhalile ngendlela lokhu okwenzeke ngayo egxeka abadlali basemuva. Emuva maphakathi bekudlala uWyne Arendse noSiyanda “Jojo” Zwane obeqala ukudlala kule sizini. Kule ndawo kujwayele ukudlala uBangaly Soumahoro noMotjeka Madisha.
“Ngiphoxekile ngendlela esingenelwe ngayo yigoli. Le nto siyenza ngaso isikhathi ejimini ukuthi uma umdlali wezitha eya ezinhlangothini nebhola, abadlali bamaphakathi emuva bahlale nabagadli ngoba usazolibuyisa ebhokisini ngeke akwazi ukushaya igoli eseceleni. Abadlali bami bavele bangena phakathi baqonda kuDenis (Onyango) bashiya umuntu ngemuva,” kusho uMosimane.
“Bobathathu ngiphoxekile ngabo, bayazi ngoba le nto siyenza njalo ejimini ukuthi uma umuntu eya ezinhlangothini usazoligoba ibhola. Kodwa bavele bakhohlwa bangena phakathi. Ngiphoxekile ukuthi singenelwe yigoli ngoba bayayazi le nto siyayenza. Kodwa lokhu kuyenzeka ebholeni bayakhohlwa. Singenelwe yigoli ebesingabhekana kalula nalo. Uma kukhona uMadisha asingenelwa amagoli anjena,” kusho uMosimane.
ISundowns izobuyela enkundleni ngoJanuwari 5 uma isivakashela iPolokwane City, ePeter Mokaba Stadium, eLimpopo. Nakuba iSundowns ivale u-2017 isazihola kwi-log kodwa ayiphelele injabulo kaMosimane ophumele obala ngokuthi uzongena ashone emakethe njengoba kuzovulwa iwindi lokusayinisa abadlali ngenyanga ezayo. ISundowns isanda kulahlekelwa ngumgadli uLeonardo Castro osezoyibamba kwiKaizer Chiefs. Isabambe umoya ngoKhama Billiat noThemba Zwane abangakazivuseleli izinkontileka zabo. Lokhu kuzokwenza ube nzima umsebenzi kaMosimane wokubhalisa iqembu elizoyibamba kwiCAF Champions League.
“Ngizoya emaholidini mhlawumbe ngijabule ngokuthi sisesicongweni se-log. Kodwa sihluliwe. Ngiyakuzonda ukwehlulwa niyangazi. Akekho okuthandayo kodwa mina angikwamukeli kahle ngoba ngikuthanda kakhulu ukuwina. Kusho lukhulu kimina,” kusho uMosimane.
“Silahlekelwe abadlali phambili. Sesivele silahlekelwe nguLeo (Castro), isimo sikaKhama akekho osaziyo. Sidinga ukwengeza lapho. UMalajila (Cuthbert) uzothatha isikhathi eside ngaphambi kokubuya. U-Anthony unokulimala okumnika izinkinga, uyabuya aphinde ahambe. Asinaso isiqiniseko ngesimo sikaRivaldo (Coetzee) akakaze aziqeqeshe nakanye nathi selokhu afika. Mhlawumbe lokho kungitshela ukuthi angiyiqaphele indawo yasemuva maphakathi. Namuhla ngidlalise uSiyanda okungeyona indawo yakhe,” kusho uMosimane.