Uthembisa into yamehlo emdlalweni omusha woMzansi
UTHEMBISA into ehlukile anethemba lokuthi abantu bazoyijabulela uMike Mvelase ozolingisa indawo kaMbatha emdlaweni omusha Ikhaya, ozoqala kuMzansi Magic, ngoMsombuluko, Januwari 8, ngo-8 ebusuku.
Isiteshi uMzansi Magic siphinde sethula omunye umdlalo ozoqala ukubonakala uma kuphela isizini yesibili yomdlalo iLockdown, osekusele iziqephu ezimbili iphele.
UMike uthe kulo mdlalo ulingisa indawo kasomabhizinisi onendodakazi ethandana nesinye isisebenzi sakhe asiqashile.
“Lesi sisebenzi siphuma eLimpopo. Sifika sithandane nendodakazi yami. Kuningi akufihlile kodwa-ke wonke umuntu kulo mdlalo unezimfihlo zakhe, okuzokwenza umdlalo uhehe kakhulu,” kuchaza yena.
Uthe ujabule ukuba yingxenye yalo mdlalo.
UReneilwe Sema, ongumqondisi wezinhlelo zakuleli kwaM-Net uthe sekuwumkhuba wabo beyisiteshi ukukhombisa imidlalo ekhuluma ngezinto ezenzeka ngempela emphakathini esiyakhele kuleli.
“SinguMzansi Magic, sifuna ukuqhubeka sikhombise imidlalo ezokwenza bakhulume ababukeli balesi siteshi. Lo mdlalo ugxile kakhulu kowesilisa ongu-Eddie (Saint Seseli), ophila impilo engamanga,” kuchaza uReneilwe.
Uthe okuzogqama kakhulu kuwo ukuthi yini ezophumelela, amanga neqiniso, njengoba konke lokhu u-Eddie ekwenza ngenxa yothando analo ngemindeni yakhe yomibili.
“Ukhetha ukudela konke njengoba evimbela noma yini ukuthi kungaphumi iqiniso lokuthi unamakhosikazi amabili nawo angazani. Siyathemba ukuthi abantu bakuleli bazowamukela ngezandla zombili,” kuchaza uReneilwe.
Uthe u-Eddie uba nezingqinamba ngokufihla leli qiniso.
“Lo mdlalo uqoshwe eDaveyton naseGaModjadji, eLimpopo. U-Eddie kukhona konke akwenzayo ukuthi amakhosikazi akhe uRaisibe (Molobane Maja-Mbatha) noCebile (Nqobile Sipamla) bangalazi iqiniso. Kodwa ekugcineni ababukeli bazobona ukuthi ukwazile yini ukugcina le mfihlo,” kusho uReneilwe.
Kulo mdlalo uthe abanye abazobonakala belingisa uMpho Molepo, Aubrey Makola, Laki Khoza, Thulane Shange, Sphamandla Dhludhlu, Khomotso Manyaka, Mbasa Msongelo no-Amanda Manku.