Kuphelile ngeMabala Noise noGigi Lamayne

UMSHADO usuphelile.

Usho kanje umrepha wesifazane uGigi Lamayne ephawula ngokushiya inkampani abeqopha kuyo iMabala Noise Entertainment. UGigi wasayina maphakathi nonyaka odlule nabanye abaculi.

“Angisekho manje. Bengingasajabule kodwa angilwi nabo. Sisayine inkontileka yokuthi ngingazidaluli izizathu zokushiya kwami,” kusho uGigi.

Uthe bekunzima kungasasebenzeki. Uqhube wathi uyifisela inhlanhla nabaculi abaqopha kuyo.

“Ngiyachichima yinjabulo. Abangani bami balokhu bengithinta bebuza ukuthi nginjani ngiyabatshela ukuthi konke kuhamba kahle. Ngikhululekile. Abantu abaqondi ukuthi zingakanani izinto esidlula kuzo njengabaculi,” kuchaza uGigi.

Lo mrepha waqala ukuzakhela ugazi ngengoma yakhe ethi Ice Cream. Ekupheleni konyaka odlule ukhiphe i-albhamu yakhe yokuqala neMabala Noise ethi iGenesis ayefisa ukudayisa igolide ngayo nokuyinto egcine ingenzekanga. Kulo nyaka ukhiphe izingoma ezihamba ngazodwa okukhona kuzo ethi My Ugly Boy, Lobola nethi 1-Bar.

UGigi uthe abalandeli bakhe ababeke indlebe ezinkundleni zokuxhumana ukuzwa ukuthi yimiphi iminyakazo azoyenza.

“Mhlawumbe ngizozimela, mhlawumbe ngizoya kwenye inkampani. Ngithatha isikhathi sami. Ngifunde lukhulu lapha futhi kube yisibusiso ukuba sekhaya elilodwa noNasty C nabanye. Ngithole ukunakwa ngabantu.”

Isikhulu seMabala Noise, uSquiks Nzuza, sithe bamfisela inhlanhla ngoba abahlukananga kabi. UGigi ufisele abalandeli bakhe uKhisimusi omuhle nokuthi bangene kahle onyakeni omusha.