Kusolwa isoka ngobulawe wagqitshwa nengane yakhe
KUSOLWA isoka ngokubulawa kowesifazane, isidumbu sakhe esitholwe sigqitshwe nesengane yakhe eneminyaka eyisishiyagalombili ethuneni elingashoni oThongathi, ngoMsombuluko.
Kusolwa ukuthi isoka, okuthiwa selinyamalele, belingafuni ukuthi aye ekhaya ngoKhisimusi.
Uyise kamufi uNksz Nelisiwe Ntuli (24), uMnuz Musa Ntuli (59) uthe utshelwe omakhelwane balapho obekuhlala khona indodakazi yakhe ukuthi isoka layo, angalazi, belimnqabela ukuba ahambe ngalo Khisimusi.
Laba kuthiwa bebehlala emjondolo yasePholana, oThongathi. UNtuli waKwaNyamazane, KwaMaphumulo uthe ushayelwe ucingo amaphoyisa ngoLwesithathu emtshela ngesigameko sokutholwa kwendodakazi yakhe nomzukulu uNolwazi bebulewe.
“Ngiphelelwa amandla ngoba naleli soka elisolwayo angilazi. Bengingazi ukuthi indodakazi yami inesoka eThekwini. Isoka lona kuthiwa lidayise umjondolo abebehlala kuwo,” kusho uNtuli.
UNtuli uthe okumqeda amandla wukuthi ubelindele ukuba indodakazi yakhe okuyiyona kuphela esebenzayo, ifike ekhaya noKhisimusi.
“Simgcine ngoDisemba 3 ezolanda indodakazi yakhe ukuba imvakashele eThekwini. Besimlindele ngoDisemba 24 ukuba afike noKhisimusi ekhaya ngoba sibheke yena. Ubesebenza ehhotela eLa Mercy. Kumanje angazi nokuthi ngizomngcwaba ngani. Izimbuzi ezintathu ngizozithathaphi. Ngifelwe yizwe,” kusho uNtuli ekhala.
Uthe usayobheka izidumbu kodwa uthole ukuthi bobabili bagwaziwe yize engazi ukuthi kuphi nendawo. Utshele Isolezwe ukuthi indodakazi ibisineminya iseThekwini yazofuna umsebenzi.
“Ingane yami yayivele ithandana nomuntu owayeyihlukumeza njengoba ifike yathola omunye, lona obekuthiwa isoka lakhe. Ngithole ukuthi naye ubeyishaya indodakazi yami. Konke lokhu besingakwazi ngoba ubengasitshelile ngesoka lakhe,” kusho uNtuli.
Umufi kuvele ukuthi ugcinwe ebonakala esitobhini ehamba nalo isoka nengane yakhe.
Okhulumela amaphoyisa KwaZuluNatal uLt Colonel Thulani Zwane uthe akekho osaboshiwe ngesigameko kodwa balandela umkhondo.