Izinhlangano zabaqwayizi zifuna ukusebenzisana nohulumeni
IZINHLANGANO zabadayisa ngomzimba zizimisele ukusebenzisana nohulumeni uma sekusungulwa imigomo ezolawula ukusebenza kwabadayisa ngomzimba.
I-ANC engqungqutheleni yayo yokukhetha ubuholi ithathe isinqumo sokuthi ikugunyaze ngokuphelele ukudayisa ngomzimba yathi izokwenza konke okusemandleni ukuvikela abenza lo msebenzi.
UNksz Kholi Buthelezi weSex Worker Movement uthe lesi sinqumo sizokwenza ukuthi kusungulwe nemigomo elawula lo msebenzi. Le migomo uthe izolawula ukuthi ngabantu abangakanani okuvumeleke ukuthi benze lo msebenzi, kulawulwe indlela yokusebenza kuphinde kuncishiswe ukuxhashazwa kwabenza lo msebenzi.
“Njengamanje abadayisa ngomzimba bayaxhashazwa, bayahlukunyezwa, babukelwa phansi futhi abavikelekile ngoba lokhu bakwenza ngokufihla. Ngenxa yenkohlakalo kunabathile abebezuza ngokuthi lo msebenzi wenziwa emfihlakalweni.,” kusho yena.
IWorld Health Organisation (WHO) nenhlangano yomhlaba yengculazi i-UNaids baphakamisa ukuthi kugunyazwe ukudayiswa komzimba ukuze kwehliswe ukutheleleka kwegciwane lengculazi kwabenza lo msebenzi eminyakeni ezingu-20 eyedlule. Lezi zinhlangano zikholwa ukuthi uma kusemthethweni ukudayisa ngomzimba kuzoba lula ukuthi abawudayisayo baye ezikhungweni zezempilo uma kunesidingo.
UNksz Nonhlanhla Mokoena wenhlangano elwa nokuhlukunyezwa kwabesifazane, iPeople Opposing Women Abuse (POWA), uthe uma kuvunyelwa ukudayisa ngomzimba abadayisi bazokhokha intela njengabo bonke abasebenzi.
Izinhlangano zamasonto zithi nakuba i-ANC ithathe lesi sinqumo ngoba ivikela abenza lo msebenzi kodwa zisamile ekutheni azihambisani nokudayisa umzimba.
UFata Smilo Mngadi webandla, amaKhatholika, uthe kungumsebenzi kahulumeni ne-ANC ukulawula nokuvikela bonke abantu, kuhlanganisa nabaqwayizi.
“Siyaqonda ukuthi i-ANC ephethe uhulumeni izoqhamuka nemithetho elawula ukusebenza kwabaqwayizi okusho ukuthi sekuzoba nezinyunyana bavikeleke njengabanye abasebenzi. Thina njengamakholwa sisamile ekutheni ikholwa akumele liwukhethe lo msebenzi. Sizokwenza isiqiniseko sokuthi sifundisa intsha yethu emasontweni ukuthi ihloniphe imizimba yayo ngoba sikholwa wukuthi uyithempeli likaNkulunkulu,” kusho yena.
UMbhishobhi Nathi Zondi weDurban Central Ministers Fratenal uthe amakholwa asamile ekutheni ukudayisa ngomzimba akusakhi isizwe.
Isolezwe lihambele abanye babaqwayizi abasebenzela emgwaqweni uClark nakuFrere (Esther Roberts), eGlenwood.
Abakhulume naleli phephandaba bacele ukungashuthwa izithombe futhi amagama abo agodlwe.
Omunye uthe ubengazi nokuthi i-ANC ibinengqungquthela nokuthi kuke kwabhungwa ngodaba lwabo.
“Kungaba yizindaba ezimnandi phela ukuba semthethweni komsebenzi wethu. Sisebenza kabuhlungu ngoba amaphoyisa ayasijaha bese singakwazi ukusebenza kahle,” kusho lo mqwayizi.
Uthe wenza lo msebenzi ngoba ephoqwa yisimo kwazise uzama impilo ngenxa yokuthi akawutholi omunye umsebenzi.
Uzakwabo oveze ukuthi uhlala eMlaza uthe ufika ekuseni agoduke ntambama.
“Ave singajabula phela uma singase sisebenze ngokukhululeka. Akukho okunye engiziphilisa ngakho ngaphandle kwalokhu. Ngondla izingane nomndeni. Ngikhuluma nje sengibeke uR1 000 kaKhisimusi ngemali engiyithola lapha,” kusho yena.
USihlalo weBulwer Safety & Urban Regeneration Forum ebhekelele indawo yaseGlenwood, uNkk Heather Rorick, uthe bakhathazekile ngokucanasa kwabadayisa ngomzimba kule ndawo ngoba kwehlisa inani lezindlu kuphinde kube nomthelela omubi emabhizinisini.
“Intengo yezindlu iyehla kanti nabathengi kuyababalekisa ukubona abadayisa ngomzimba begcwele umgwaqo. Nabamabhizinisi bamanqika ukuwaqala ngoba banqena ukuthi imigwaqo igcwele laba besifazane,” kuchaza yena.
Uthe ukuba semthethweni kokudayiswa ngomzimba mhlawumbe kungasiza kwehlise isibalo sababonakala emgwaqweni uma umthetho ungafakwa ngendlela.
“Angiboni kuzokwenza umehluko uma kungezukubekwa imibandela yokuthi lokhu abakwenzayo bakwenzele ngasese endaweni esithekile, hhayi emphakathini. Asinankinga nokuthi kube semthethweni ukudayisa ngomzimba inkinga iqala uma sebekwenzela esidlangalaleni, ikakhulukazi ngoba kunezikole futhi eduzane. Uma uhulumeni engabeka lowo mthetho imiphakathi enale nkinga ingasizakala kakhulu,” kusho uNkk Rorick