Kutelekiwe kwaShoprite
KULINDELEKE ukuthi kuphazamiseke ukuthengela uKhisimusi namuhla ezitolo zakwaShoprite ngenxa yesiteleka sabasebenzi abangaphezu kuka30 000 kuzwelonke.
Inyunyana yabasebenzi bakwaShoprite iSouth African Commercial, Catering and Allied Workers Union (Saccawu) ikuqinisekisile ukuthi akukho lungu layo elizosebenza namuhla futhi isiteleka sisemthethweni.
Okhulumela iSaccawu, uMnuz Khulekani Ngubane uthe bayihambise ngoLwesibili kubaqashi incwadi yesiteleka. Uthe isiteleka kade safufusa ngenxa yokunganeliseki ngezimfuno zabasebenzi kusukela ngo-2015.
“Sinenkinga nabaqashi abazithathela izinqumo ngabasebenzi bethu ngaphandle kokuxoxa nathi. Banomkhuba wokuya kubasebenzi babashintshise izikhathi zokusebenza, banciphise namahora.
Abanye abasebenzi batshelwa bengazelele ukuthi sekumele bashintshe bangene ebusuku ekubeni bengahlinzekwanga ngemoto yokubagodukisa. Kukhona nabesifazane esikhathazekile ukuthi abaphephile uma besetshenziswa ebusuku,” kusho uNgubane.
Uthe ngo-2015 bafaka udaba kwiCommission for Conciliation, Mediation and Arbitration (CCMA). Isinqumo sakwaCCMA sivune bona, umqashi wacela kuxoxwe ngaphandle nakhona kwangalunga.
Ukhale ngokuthi umqashi ubevele abajikele esiswini njengotshwala uma sekumele kuvunyelwane, yingakho bebone isiteleka sekuyisona isisombululo.
“Sizoqinisekisa ukuthi akuthengwa kwaShorpite ngisho bangazama ukuvula. Sicele ukwesekwa yizinhlangano zamadlelandawonye okubalwa kuzo iSACP, ANC neSanco ukuze umqashi abone ukuthi asidlali,” kusho uNgubane.
Isitatimende esithunyelwe yiSaccawu esifundazweni siveze ukuthi abasebenzi bazoba nemashi ezosuka ngo-10 ekuseni eKing Dinuzulu Park eThekwini, iphele eCity Hall lapho abaphathi bakwaShoprite bezokwamukela khona incwadi yezikhalo.
UMnuz Sizwe Pamla okhulumela iCosatu kuzwelonke, uthe baseseka ngokuphelele isiteleka sabasebenzi beSaccawu. Unxenxe ukuthi nabathengi bangangeni ezitolo zakwaShoprite uma kukhona ezizobe zivulile namuhla.
Unxuse nokuthi abasebenzi bajoyine amamashi azobe ehlelwe kuzwelonke ukuzwakalisa ilaka labo. Okunye okusohlwini lwezikhalo zabasebenzi kubalwa ukuxoshwa kwabasesitolo eSandton eGoli, okuthiwa bebengahambisani nokushintshwa kwamahora okusebenza. Bakhala nangokuthi baningi abayitoho kunabaqashwe ngokugcwele.
Isitatimende esithunyelwe ngabakwaShoprite siveze ukuthi bayazi ngesiteleka kodwa sihlelwe yiqeqebana labasebenzi.
“Sizoqinisekisa ukuthi ukuthenga akuphazamiseki ezitolo zethu. siphoxekile ukuthi isiteleka sihlelwe ngesikhathi sikaKhisimusi kodwa yilungelo labo abasebenzi ukuteleka, siyakuhlonipha lokho,” kusho isitatimende.