Abalimi bashaya amakhala ngolomhlaba
IZINHLANGANO ezehlukene zithi uma i-ANC iqhubeka nokuchibiyela uMthethosisekelo ukuze kubuyiswe umhlaba ngaphandle kwesinxephezelo abatshali bezimali bazobaleka bese kwehla ukwethenjwa kwezwe.
Lokhu kuvezwe yinhlangano yabalimi i-AgriSA ethi uma kuchitshiyelwa isigatshana u-25 umnotho uzofadabala ngoba umkhakha wezolimo iwona okhulisa umnotho.
Isitatimende esikhishwe ngumengameli wale nhlangano, uMnuz Dan Kriek, sithe bafuna ukuhlangana noMengameli we-ANC, uMnuz Cyril Ramaphosa, mayelana nalolu daba.
Usho lokhu kulandela ukunquma kwengqungquthela ye-ANC ukuthi kumele umhlaba ubuyiswe ngaphandle kwesinxephezelo.
“Sifuna i-ANC ichazele abantu bakuleli mayelana nalezi ziphakamiso nokuchitshiyelwa koMthethosisekelo. Zikhona ezinye izindlela ezingasetshenziswa ngale kokudla umhlaba ngaphandle kwesinxephezelo.”
URamaphosa evala ingqungquthela izolo ezintatha uthe indaba yomhlaba iyinkinga wathi yingakho kumele kuchitshiyelwe uMthethosisekelo.
“Ingqungquthela ivume ngoelethu ukuthi kubuyiswe umhlaba ngaphandle kwesinxephezelo. Indaba yomhlaba ibange ubuhlungu nezinkinga kubantu bakithi okwenze abantu babhuqwa yindlala,” kusho uRamaphosa.
Uthe uma kwenziwa ngeke kuze kubeke engcupheni ukukhiqizwa kokudla nomnotho.
Ukuze kuchitshiyelwe uMthethosisekelo i-ANC izodinga ukusebenzisana namanye amaqembu ukuze lesi siphakamiso sithole ukwesekwa njengoba inezihlalo ezingu-249 kwezingu-400 ePhalamende.
I-EFF ike yasifaka lesi siphakamiso ePhalamende kodwa sachithwa ngemuva kokungatholi ukwesekwa amalungu ePhalamende.
IBusiness Unity South Africa (BUSA) izwakalise ukukhathazeka ngalesi siphakamiso yathi izofuna umhlangano osheshayo ne-ANC ngalolu daba.
I-DA ithe iyakweseka ukubuyiswa komhlaba uma kuzosiza abantu basemakhaya abantulayo ukuze baphume ebubheni.
UMnuz Enoch Godongwana, usihlalo wekomiti elibheka izinguquko kwezomnotho kwi-ANC, uthe abantu bakuleli balambile wathi bazosebenzisana namanye amaqembu ukuchibiyela uMthethosisekelo ngoba abanawo amandla enele adingekayo uma uchibiyela uMthethosisekelo.
I-ANC iyalele uhulumeni ukuthi uqalise izinhlelo zokuthi iBhange loMbuso lilawulwe nguMbuso.