Bakhala ngokulaxazwa kweSACP
BASHAYWE ngesithende abaholi bamaKhomanisi esigungwini esiphezulu se-ANC njengoba uNobhala Jikelele uDkt Blade Nzimande nabanye abaholi bengalibonanga elidlalayo kukhishwa uhlu lwamalungu ayingxenye yalesi sigungu kuze kube u-2022.
Abanye abaholi abashaywe ngesithende oMnuz Thulas Nxesi, Senzeni Zokwana, Rob Davies noButi Manamela.
UDkt Zweli Mkhize, ohoxe ngomzuzu wokugcina ekungeneleni umbango wokuba iphini likamengameli uzihola phambili ohlwini lwabantu kulesi sigungu.
Abanye abaholi abangenile oMnuz Collen Maine, umengameli wophiko lwentsha lwe-ANC, uMnuz Senzo Mchunu, ohlulwe kwesikanobhala, oNksz Lindiwe Sisulu, Baleka Mbete abebesembangweni wokuhola i-ANC kanjalo noMnuz Jeff Radebe.
I-SACP KwaZulu-Natal iyakhala ngokungaqokwa kwabaholi bayo kulesi sigungu.
Esithangamini nabezindaba eSadtu House, eThekwini, izolo, uNobhala wamaKhomanisi uMnuz Themba Mthembu uthe abajabule neze ngokwehla kwesibalo sabaholi babo kwiNEC ye-ANC ikakhulukazi njengoba besemkhankasweni wokuqinisa amadlelandawonye.
“Nakuba bekhona abaholi bethu abahlala esigungwini esiphezulu seSACP, iCentral Executive Committee okubalwa kubo oRadebe, Sdumo Dlamini noNkk Zingiswa Losi kodwa aseneme ngokuthi abaholi abafana noNzimande nabanye bashiywe ngaphandle,” kusho uMthembu.
Eqhubeka uthe: “Siyamethemba noMengameli omusha we-ANC uMnuz Cyril Ramaphosa ukuthi uzozibophezela obumbanweni njengoba eke weza ezosicela ukuthi singazimeli okhethweni,” kusho uMthembu.
Umhlaziyi wezepolitiki uMnuz Lukhona Mnguni, waseNyuvesi yaKwaZuluNatal, uthe kubukeka sengathi i-ANC imlalelile ekhweleni alenza lokuthi kumele ikhonjwe indlela iSACP ngemuva kokungenela ukhetho ngokuzimela.
Abanye abakhuze ibuya kulesi sigungu se-ANC oMnuz Mduduzi Manana, owalahlwa yicala lokushaya abesifazane waze wasula njengePhini likaNgqongqoshe weMfundo ePhakeme, uNksz Bathabile Dlamini noNkk Nomvula Mokonyane.
Lesi sigungu sihlanganisa uhlangothi lukaRamaphosa nolukaDkt Nkosazana Dlamini Zuma.