Bahlelekile abazali abathengele izingane zabo umfaniswano
NGOLWESITHATHU besinodaba olukhuluma ngabazali abakhethe ukuthengela izingane imifaniswano yesikole manje ngoDisemba ngoba bafuna kufike uKhisimusi noNcibijane yonke into yesikole isithengiwe.
Omunye wabazali oxoxe nephephandaba uthe: “Anginandaba kangako noKhisimusi, okubalulekile yisikole. Kungcono ukuthenga manje ukuze imali ingahambi noKhisimusi, ngizitshele ukuthi ngifuna kushaye uJanuwari izingane sezilungele ukungena esikoleni.”
Isikhathi sikaKhisimusi sisho izinto ezehlukene kubantu abehlukene kuye nangenkolo yabo kodwa okufanayo okwenziwa yiwo wonke umuntu ngalesi sikhathi ukukhithiza ngoba yisikhathi senjabulo nokuphana. Nokho-ke kulokhu kukhithiza, abanye bathatha ngamawala, bakhohlwe ezinye izinto ezibalulekile nokuthi impilo kumele iqhubeke uma sekudlule amaholidi.
Abanye-ke balaba bantu abathenga ngendlela eyihaba baye bakhohlwe yizinto zesikole zabantwana bese kuthi uma sekuqala unyaka ubabone sebebakaza kube sengathi ibazumile indaba yokuthi izingane zidinga ukubuyela esikoleni.
Yingakho-ke kujabulisa uma sesibona abazali abenza njengalaba ebesibhale ngabo ngoba kusho ukuthi lukhona ushintsho kancane kancane futhi noma ngabe baseyidlanzana abenza kanje kodwa kuyogcina ngelinye ilanga kwenziwa yiwo wonke umuntu.
Ngokuthenga manje laba bazali bagwema nokuzithola esiminyaminyeni solayini abade ababa sezitolo zemifaniswano ngoJanuwari.
Ukuzijabulisa kuhle futhi uKhisimusi usekupheleni konyaka okusho nokuthi abantu basuke befuna ukukhohlwa yizinto “ezigqilazanayo” ngoba basuke bethwele unyaka wonke.
Kodwa-ke ngokwenza njengala bazali ufundisa nezingane ukuthi empilweni uyabhalansisa ukuze yonke into ihambe kahle. Ngokubukela abazali bazo lezi zingane seziyacosha ukuthi uyazijabulisa kodwa futhi ube uzihlela nezinto ezimqoka ngononina hhayi ukunaka kakhulu okukodwa. Lokhu kuzokwenza ukuthi nazo uma sezenza izinqumo ngelinye ilanga zenze kanje ngoba izingane zifunda kakhulu ngokubukela kunezikutshelwayo.