U-CR17 akaqede ukuxhashazwa
MHLELI: Ngivumele ngiphefumule ngokunqoba kuka CR17. Okokuqala ngifuna ukudlulisa ukujabula kwami ngokuphumelela kukaRamaphosa ebengifisa ahole leli lizwe.
Umbono ojikelezayo kubahlaziyi bezomnotho nabepolitiki uthi ukuqokwa kwale ndoda kuzobuyisa ithemba kubatshalizimali akade sebephose ithawula ngendlela izinto ebezenzeka ngayo kuleli. Nami nginombono wokuthi uzokwazi ukukhulisa umnotho wethu.
Ebengithanda ukukugcizelela kakhulu ukuthi ukukhula komnotho kuyoba ize leze uma impilo yabantu abasemazingeni aphansi ingaguquki. Ngicabanga ukuthi uRamaphosa uyazi ukuthi ngeke uma wakha indlu uqale ngesisekelo esibhedayo ngethemba lokuthi uzofaka uphahla oluqinile. Abantu bakuleli babhekene nezinkinga eziningi okudingeka iziphathimandla zizixazulule.
Isibonelo, kunomkhuba wosomabhizinisi wokushaya indiva abantu bakuleli baqashe abangaphandle khona bezobaxhaphaza kahle, okwenza abantu bakithi bagcine sebengondinga s’thebeni. Amabhizinisi amancane yiwona anamathuba amaningi omsebenzi. Uma abantu bakithi bengaqashwa ngenxa yabasebenzi abaholelwa amakinati, kuyinkinga enkulu okumele uhulumeni kaRamaphosa ubhekane nayo ngqo. Enye inkinga ukuxhashazwa kwabantu abamnyama ngamaNdiya bebe beholelwa amakinati.
Konke lokhu kudala ukuthi igebe phakathi kwabahlwempu nabadla izambane likapondo likhule njalo.
Uma ehlulwe ukubheka nalezi zinkinga ngisho umnotho ungakhula kodwa abantu bakithi besaxhashazwa, uyothi ephuma kuyobe kuthiwa ukhulisele ongxiwankulu umnotho okuyinto vele esolwayo ngaye kuyimanje nje.
Ngaphezu kwalokho osomathuba bayobe sebedle badela ngalokho. Mzwandile Sithole EMTSHEZI