IZINKONDLO
Sengiyakholwa ukuthi sewafa, Ngoba noma ilanga liwukhanyis’ umhlaba Ngibon’ ekusen’ izilwane ziklaba, Ziziphunga ngamashob’ anenhlali, Emhloph’ okwezinkomazi zakith’ eMhlali,
Nokho sengike ngabona kuhlw’ emini. Sengiyakholwa ukuthi sewafa, Kwangihlwel’ emini ngoMandlakayise.
Ngabe ngiyathe ngiyancenga bangiyise, Bangithela ngamanz’ ezinyembezi, Ngambon’ elele bengakamembesi. Ngalibon’ iphupho liz’ emini. Nango Nomasomi kwabanjalo, Izinkantolo zamehlo zacimeza, Wabanda wehlulw’ ukuzifudumeza. Mina ngema ngaqhaqhazela izingalo Ngilunguz’ ubuso bakho buhwelela, Nobuhle benqaba bangifiphalela.
Ngingekhohlwe kanjan’ ukuthi sewafa Um’ umgwaqo wakho uvulekile, Ngibon’ iminyaka yonk’ ubhudulekile?
Wena kungathi wahamba umnyang’ uvuliwe
Khon’ abanye beyophuma sengathi badiniwe,
Kanti sebelandela wena bangabuyi. Ngibekelen’ isigqiki sobukhosi Phezu kwamagagas’ olwandle, Ngiqhwakele namaqhawe eNgobamakhosi.
Sengogiya kuthi cwaka, mntanenkosi.
Sengaphenduk’ izigobhe ngilinde ngaphandle
Ukukhithika kwezaqheqhe zomkhumbi wothando.
Sengogiya kuthi cwaka, mntanenkosi
Esibelethweni sensengwakazi ngibheke kwanhliziyo ngise Ngisho ngengila ngithi Angiseyikubalwa nabafokazana bebhodl’ umzwangedwa njengomnyewu,
Sengotetemuk’ enkabeni yolwandle ngakithi
Lapho ngiqabul’ izinyembezi zendlovukazi yamaNgisi, mntanenkosi. Sondelani zintombi zakithi, Nindlal’ amaqabung’ endlelen’ enameva
Nginyathele sakuqhenya kuphuphum’ uju ngijule. Ngigayelen’ obamaganu ngizothe, Ngizothe sakuklolodel’ izinkothangqoko zamambuka,
Ngintante phezu kwamandambi ngisesigqikini segolide. Hlabelelani zintombi zaseMbo,
Sengozidel’ amathambo nginibhixe ngamakha
Lapho niphuphutheka njengozendazamshiya wakwethu.
Zinhl’ ezaseMbo zingivusel’ umunyu, Ngizibona ngifanelwe ukuthath’ isithole sakhona, Ngiwashay’ indiv’ amacuban’ angenazwelo Lapho sigabavula phezu kwegagasi, mntanenkosi.
Zodel’ izinsizwa zakithi ngigcagcelwa, Zokhwifa kushon’ ilanga, Ziphenduk’ omahlek’ ehlathini zehla zenyuka.
Sengogiya kuthi cwaka, mntanenkosi.
Ngingengcwekisane novukuvale bendawo, Ngizoyigawul’ ezizwen’ induku, Induk’ enyazima njengonyazi Kubhoklozek’ inzondo yenqunywakhanda.
Sengotus’ izalukazi zaseMhlongamvula
Ngokukheth’ imbal’ engebuniswe yizifo negqabho.
Sukumani zinsizwa zakithi Nihube ihubo lesizwe sakithi Ngigiye kuthule kuthi cwaka ngakithi.