Belapha abahlala emgwaqweni
AKUWONA umdlalo ukunakekela abahlala emgwaqweni abavame ukuhlaselwa wumkhuhlane nezinye izifo ezidalwa yimpilo yasemgwaqweni.
Abasebenzi basemtholampilo Usizo Lwethu ongaphansi kwesikhungo, iDenis Hurley eThekwini, sebekujwayele ukubhandisha izilonda zabalimele emgwaqweni belaphe nezinye izifo.
UNksz Nokuthula Mantshiyo (72), ongomunye wabahlengikazi, uqale ngonyaka odlule ukuvolontiya kulo mtholampilo. Uthe wawenzelwe abahlala emgwaqweni kuphela kodwa aseyalashwa namalungu omphakathi.
“Abahlala emgwaqweni badinga ukunakekelwa ngoba bayalimala baphathwe nawumkhuhlane. Izimo abahlala kuzona zenza bangenwe yizifo. Kwesinye isikhathi bavumbuka nezilonda ngenxa yokungagezi,” kusho yena.
Uthe usizwa yisipiliyoni emsebenzini awenza elekelelwa odokotela nabanye abahlengikazi ababili.
UNksz Mpume Fuze, ongomunye wabanakekela abagulayo, uthe akuzange kube lula esaqala. Uthe unakekela iziguli ezinofuba nezidla imishanguzo yegciwane lengculaza.
“Bekunzima ngisaqala kodwa sengisijwayele isimo. Sinezinkolelo eziningi ngabantu abahlala emgwaqweni kodwa uma ususondele kubona iyashintsha indlela ocabanga ngayo. Ngifunde ukuthi balethwe yizimo ezibuhlungu emgwaqweni futhi bayathanda ukulalelwa, abafuni ukwahlulelwa,’’ kusho yena.
UNksz Fuze uthe inselelo abanayo wukuthi kumele baqinisekise ukuthi bayayithatha imishanguzo yabo.
“Kumele bayiphuze phambi kwami ngoba ngeke ubathembe uma behamba nayo. Siqala ngokubanika ukudla ngoba abanye basuke bengenako. NgoLwesihlanu sibanikeza abazoyiphuza ngempelasonto sibadonse ngendlebe sithi bayiphuze. Kuyenzeka abanye babuye ngesonto elilandelayo bengayiphuzanga.”
Umphathi womtholampilo, uNkk Ruth Birthwhistle, uthe kunzima ukunakekela abahlala emgwaqweni ngoba bayahluleka ukuzinaka. Mayelana nabasebenzi babo, uthe babakhuthaza ukuthi baqale ngokuvolotinya ukuze bajwayele isimo. Uthe umuntu uyazikhethela esavolontiya ukuthi uzomelana yini nesimo. Uveze nokuthi baningi nabesifazane abasuke bekhulelwe emgwaqweni ababadlulisela kweminye imitholampilo.
Lo mtholampilo uneminyaka emithathu welapha iziguli. Uxhaswa wuhulumeni nezinye izinhlangano.