Ngeke ulibaleke umonakalo wezikhukhula osekhona
SEKUPHELA inyanga yesibili izikhukhula zahlasela KwaZuluNatal kodwa izindawo ezathinteka ngesikhathi sihlasela zisabonakala.
Izikhukhula ezinjengalezi kuthiwa zagcina ukuhlasela kulesi sifundazwe eminyakeni engu-20 eyedlule. Ngaphandle kokulimala kwempahla ezindaweni eziningi eThekwini, lezi zikhukhula zidlule nemiphefumulo yabantu abangu-14.
Uma kukhulunywa ngezinhlekelele ezenzeke kulo nyaka ngeke zisale ngaphandle lezi zikhukhula.
Kwabashona kubalwa nomfundi owakhukhulwa ngamanzi ezama ukuwela emfuleni ephuma esikoleni nengane eyemuka enkulisa okwaphela izinsukwana isidumbu sayo singatholakali.
Abahlala emijondolo eseduze nemihosha bathuthelwa emahholo ehlukene.
Uma uhamba eMlaza, eSiphingo, eLamontville, eWema nakwezinye izindawo kusemagedugedu, imigwaqo ayikalulungiswa.
Ojantshi besitimela kwezinye izindawo basalungiswa.
Indawo yaseSiphingo uma kucutshungulwa kuthiwa yiyona eyakhahlamezeka kakhulu kulezo zikhukhula. UNkk Zandile Gumede, iMeya yeTheku waveza ukuthi indawo engasesikhumulweni sezindiza esidala kwatholakala ukuthi kunamathuba amaningi okuthi iphinde ihlaselwe yizikhukhula, uma kwenzeka kuba nemvula enkulu.
Ukulahlwa budedengu kwemfucuza kule ndawo kuthiwa nakho kube nomthelelela omkhulu ekutheni ingqalasisinda esindala ehamba amanzi emvula, ingasebenzi kahle.
Amahostela aseNingizumu yeTheku, izindlu ezaba nomonakalo akukalungiswa, abahlala kulezo zindlu basakhosele ezihlotsheni.
Isikhungo semfundo ephakeme, iMangosuthu University of Technology (MUT) naso sakhahlamezeka ngesikhathi kuhlasela izikhukhula.
Abafundi abahlala emijondolo eyaziwa ngokuthi iseMhlabeni babhale izivivinyo zabo sebekhoseliswe kwezinye izindawo ezihlala abafundi bakulesi sikhungo.
Umonakalo owenzeke ngalesi sikhathi ulinganiselwa kuR200 million.
UNkk Isabel van Westhuizen wakwaPrasa Metrorail uthe ukulungiswa kojatshi besitimela phakathi kweReunion noMzinto kusazothatha isikhathi.
Lo mzila usavaliwe njengoba ulungiswa. Le nkampani ihlulekile ukukhokhela amabhasi abethutha abagibeli.
Yize kube nemvula engaka ongoti bathi isomiso asikakapheli, umphakathi usanxuswa ukuthi usebenzise kahle amanzi, ubikele umasipala ngamapayipi avuzayo, ulungise nompompi abavuzayo.