Uncoma abaqeqeshi benkulisa yeChiefs
ISITOBHA seKaizer Chiefs, uSiyabonga Ngezana, sibathulela isigqoko abaqeqeshi benkulisa yaleli qembu ngezinga elikhonjiswa ngabadlali abasuka kuyona.
UNgezana (20), okhushulelwe eqenjini elikhulu laMakhosi ngasekuqaleni kwesizini, usephenduke intandokazi yabalandeli. Emdlalweni wakhe wokuqala kwi-Absa Premiership ushaye igoli elisize iChiefs ngesikhathi ihlula iMamelodi Sundowns ngo 2-1 koweligi.
UNgezana ungomunye wabadlali abathole ithuba emuva kokulimala kwezethenjwa eziyibamba emuva kwesokudla kwiChiefs okunguRamahlwe Mphahlele noKgotso Moleko. Nakuba esemncane kodwa ukukhombisa kwakhe ukuvuthwa kumhlabe umxhwele umqeqeshi uSteve Komphela. Lo mqeqeshi umnyusele esikimini esikhulu.
Ngaphandle kukaNgezana, iChiefs inyusele esikimini esikhulu uWiseman Meyiwa waseMgungundlovu noKhotso Malope obebolekiswe kwiThanda Royal Zulu ngesizini edlule.
Eminyakeni edlule inkulisa yeChiefs kade isihluleka ukukhiqiza abadlali abafika eqenjini elikhulu bangene khaxa. Kusukela ngo-1999 uJabu Mahlangu uyena umdlali okusakhulunywa ngaye okhushulelwe esikimini esikhulu wafika waqhakaza. Emuva kwakhe kuqhamuke ukaputeni u-Itumeleng Khune. Eminyakeni embalwa edlule inkulisa yeChiefs ivaliwe ngenxa yezinsolo zokukokotelwa kweminyaka yabadlali. Isiholwa ngumqeqeshi uConti Kubheka.
“Kuhle ukwenyuselwa eqenjini elikhulu ngoba kugqugquzela abadlali abasebancane ukuthi basebenze ngokuzikhandla enkulisa. Iminyango ivuliwe eqenjini elikhulu. Sonke isikhathi uma udlala bakubhekile. Sinenhlanhla ngezinto ezenzeka ngezikhathi zethu ngoba sithola ukugqama kalula kwiMDC engomunye umnyango okunikeza ithuba lokubonwa hhayi ngamaqembu amakhulu kuphela kodwa naphesheya kwezilwandle,” kusho uNgezana.
“Lokhu kusho ukuthi abaqeqeshi bethu basenkulisa benza umsebenzi oncomekayo. Sekunoshintsho ohlakeni lokuthuthukisa abadlali. Ngicabanga ukuthi benza kahle ngoba baletha abadlali eqenjini elikhulu futhi labo badlali bafike bakhombise ukulangazelela ukudlala.”
Amaqembu amakhulu eMzansi ahlale egxekwa ngokuvalela ngaphandle abadlali abasuka ezinkulisa. Iningi libona lokhu kudalwa yingcindezi ekubaqeqeshi yokuthola imiphumela ukuze bahlenge imisebenzi yabo. IMamelodi Sundowns ikhombisa ukuvuna izithelo ngomdlali wasemuva uMotjeka Moshisa osephinde wagixabezwa ngenkontileka entsha. ISuperSport United iyaziqhenya ngoSipho Mbule noTebogo Mokoena emthathe enkulisa yaseFree State, iHamornony Academy.
UNgezana uthole ithuba esikimini esikhulu seChiefs esebuya eqenjini lesizwe likaUnder 20.
“Kungisize kakhulu ukubizwa kuMajita, ngenye yezinto eyenza usheshe unyuselwe eqenjini elikhulu njengomdlali,” kusho uNgezana.