I-Ajax idedele izembe kuMenzo yabuyisa u-Ertugral
IBUYISE uMuhsin Ertugral i-Ajax Cape Town ekhombe indlela uStanley Menzo, waseNetherlands ngenxa yokwehluleka ukuwinisa iqembu.
Leli qembu laseKapa alizange lipholise maseko izolo labhala isitatimende liqinisekisa ukuthi u-Ertugral uyena osezothatha izintambo.
“Kuyinjabulo kithina ukuthi siphinde sathola uMuhsin,” kusho isikhulu se-Urban Warriors u-Ari Efstathiou kwi-website yeqembu.
“UMuhsin akamusha eqenjini futhi uyiqonda kahle indlela yethu yokudlala nendlela esifuna ukuwina ngayo. Unolwazi olunzulu uma kukhulunywa ngokwenyusa abadlali benkulisa yethu okuyinto ebalulekile eqenjini nekusasa lalo. Siyamemukela ngezandla ezimhlophe.”
Emidlalweni engu-30 edlalwe i-Urban Warriors ngaphansi kobuholi balolu ngqwazi lwaseHolland (uMenzo) ikhombisa ukuthi uphumelele ukunqoba eyisikhombisa kuphela. Emidlalweni engu-13 kuleyo, uMenzo neqembu lakhe bahluleke ukubhakuzisa inethi. Lokhu kugcine kuzikisa leli qembu mamazansi ne-log ye-Absa Premiership.
“Mhlawumbe isinqumo sokushintsha umqeqeshi yisona esiphuse kunazo zonke njengamanje kwazise iqembu alihleli kahle futhi nesizini isingena kuvuthondaba. “Kusemqoka futhi ukuthi ngaphambi kokubuyela ekhaya ngibonge umndeni wonke we-Ajax, kusukela kubaphathi kuze kufike kubadlali abebehlale bengeseka ngaso sonke isikhathi,” lawa iwona kuphela amazwi ashiwo uMenzo ngemuva kokuxoshwa kwakhe.
Nakuba bebaningi abaqeqeshi abaziwayo abangenawo umsebenzi njengamanje kodwa igama likaMuhsin Ertugral yilona elivele kuqala.
Umthombo weSolezwe ongaphakathi kwi-Ajax usitshele iqembu belifuna umqeqeshi onolwazi lwePSL.
“Ngenxa yesimo seqembu nokushoda kwesibalo semidlalo yokulungisa izinto bebefuna ukuqasha umuntu olazi ukusuka nokuhlala ibhola lakuleli. Angazi-ke lokho noma kusho ukuthi u-Ertugral yini. Engikwaziyo ukuthi ukhona lapha eNingizimu Afrika. UseKapa lapho enomuzi khona. Usungafunda kwezakho uma ukwazi kodwa abakasho lutho,” usho kanje umthombo wethu ngaphambi kokuthi i-Ajax ikhiphe isitatimende kwi-website yayo ngokusemtheweni.
Ngaphandle kokubuyela amahlandla amabili kwi-Ajax lo mqeqeshi useke wasebenza kwiKaizer Chiefs, Lamontville Golden Arrows, Mpumalanga Black Aces ne-Orlando Pirates asule kuyona bukhoma kuthelevishini ngemuva kokunenebulwa yi-Orlando Pirates ngo 6-1 ngoNovemba ka-2016.