Izitayela zikaRakhale zimdonsele amanzi
SIXOSHISWE yizitayela kwi-Orlando Pirates isilomo somdlali uThabo “Jomo” Rakhale esibolekiswe kuChippa United. Izolo ekuseni iPirates ithuse inqwaba yabalandeli bayo imemezela ukuthi uRakhale akasesiyona ingxenye yeqembu.
URakhale uphambane noDiamond Thopola noPhetso Maphanga asebezogijima kweZimnyama.
Usihlalo wePirates u-Irvin Khoza utshele Isolezwe ukuthi uRakhale bamdedele ngenxa yokuthi izitayela zakhe azilisizi ngalutho iqembu.
“Imijiko ayisho lutho. Into emqoka wukuthi wakhe amathuba amangaki futhi uvalele amangaki enethini. Isitayela seChippa sizomfanela uRakhale. Ibhola akaligobi ngesikhathi ukuthola abadlali abafana noGabuza (Thamsanqa). URakhale uyama nebhola. Thina sifuna umuntu ozothatha ibhola ajuqe izitobha njengoba kwenza uThabo Qalinge noLuvuyo Memela,” kusho uKhoza.
URakhale ujoyine iPirates ngo-2013 kodwa wabolekiswa kwiSivutsa United nePolokwane City ngaphambi kokubuyela kweZimnyama ngo-2014.
KwiChippa United uzofike asebenze noTebogo Moloi abesebenza naye kwiPirates. Ngesikhathi uRakhale esekwiPirates, uMoloi ubeyiphini likaVladimir Vermezovic no-Eric Tinkler.
“Ijezi lePirates liyasinda. Lo mfana uke wahlala ebhentshini isikhathi eside. Akuphelile ngaye kwiPirates ngoba simbolekisile. Uma enza kahle sizombuyisa. Isimo sakhe sizolokhu sisibheka,” kusho uKhoza.
Umqeqeshi weChippa, uMoloi utshele leli phephandaba ukuthi ujabule ngokuthola uRakhale.
“Ngijabule ngokuthola elinye ithuba lokusebenzisana noJomo. Ngimazi kudala esadlala kwiSivutsa Stars. Ngiyazi ukuthi yini okumele ngiyenze ukuze enze izimanga. UJomo akadingi ukuthi umtshele izinto eziningi. Ungumfana okuthakaselayo ukuba senkundleni. Udinga umluleke ngamaqhinga amancane okumele awasebenzise ezindaweni eziyingozi. Uma umnike inkululeko uzokudlalela,” kusho uMoloi. URakhale ungomunye wabadlali bePirates abathandwa kakhulu ngenxa yazo izitayela ezishiya abalandeli bejabule. Umlandeli wokuqina wePirates uMama-Joy Chauke usale edumele ngokuhamba kwalo mdlali.
“Angifuni ukuqamba amanga ngidumele ngokushiya kukaRakhale. Nguyena bese kuba nguThabo Qalinge ngibathatha njengabafana bami. Badlala ibhola ngothando futhi benze le nto esiyifunayo njengabalandeli. Nokho ayikho into esingayenza uma iqembu lithathe isinqumo sokumdedela. Simfisela inhlanhla kwiChippa kodwa sizomkhumbula,” kusho uMama-Joy.