Ugence isihlobo ngembazo sashona
USHAQEKILE umphakathi waseMbalane, eMuden ngaphandle kwaseGreytown, ngesigameko sokugencwa ngembazo kukamzala obehlupha amalungu omndeni ngoKhisimusi.
UMnuz Mzamo Ndlovu (21) ushone kulandela ukugencwa umzala wakhe ngembazo kade bezihlalele bephuza ngoKhisimusi.
Abazali bakamufi nomsolwa kuthiwa abandawonye.
Isolezwe lithole ukuthi umufi ubehlupha ehilizisana nabantu, efuna nokubagwaza ngommese.
Umufi ubesexoshwa emzini kamzala wakhe, abevele bengazwani naye kulandela ingxabano abake baba nayo ethinta ukwebiwa kwezinkomo. Umufi kuthiwa unqabile ukuhamba kodwa wavele wakhipha ummese, wavimba emnyango ethi uzogwaza wonke umuntu.
Umzala kuthiwa uthathe imbazo ebisemnyango wamgenca kanye entanyeni, umufi ushonele khona lapho.
Okhulumela amaphoyisa KwaZulu-Natal, uLt Colonel Thulani Zwane, ukuqinisekisile ukuthi umzala oneminyaka engu29 uboshiwe endaweni yesigameko, nembazo esetshenzisiwe itholwe endaweni yesigameko isagcwele igazi.
“Amaphoyisa ase-Rietvlei avule icala lokubulala kulandela ukuba owesilisa ona-21 egencwe ngembazo. Esisakutholile ngokophenyo ukuthi umsolwa ubehlezi kuphuzwa ngoKhisimusi. Umsolwa kuthiwa uqhamuke nembazo wamgenca. Kubizwe amaphoyisa afike abopha owesilisa ona-29. Imbangela ngesigameko iyaphenywa. Umsolwa uzovela ngoLwesithathu (namuhla) eNkantolo yeMantshi eGreytown,” kusho uZwane.
Ikhansela le-IFP kule ndawo, uMnuz Bhojabhoja Dlamini, lithe lesi sigameko silishaqisile futhi likhathazekile kakhulu ngaso. “Umndeni ngibonene nawo namhlanje (izolo) ngesigameko esibehlele. Ngokuzwa ngabo kube nokuphambana kade kuhleziwe kuphuzwa. Babe sebejahana befuna ukulwa. Umnikazi womuzi nongumsolwa uthole imbazo egcekeni, wayisebenzisa kwagcina kuphume isidumbu. Siyakugxeka okwenzekile,” kusho uDlamini.
Uthe sekujwayelekile endaweni ukuba kube nezigameko ezifuze lezi uma abantu bezijabulisa ngotshwala.
“Sifuna ziphele lesi zigameko zokubulawa kwabantu kade kuphuzwa utshwala. Abantu abafunde ukuthi bangaphuzi beqise baze bazithole sebelimaza abanye noma belinyazwa. Isikhathi sokuba ujabule kodwa uqaphele nempilo yakho,” kusho uDlamini. Le ndaba kuthiwa ikhulunywa kuso sonke isigodi njengoba ishaqe umphakathi.
Ilungu lomndeni elithintwe Isolezwe izolo alithandanga ukuphawula lathi lubucayi udaba njengoba kukhona oboshiwe ngesigameko.
Uyise kamufi akazange atholakale izolo kade efonelwa njengoba kuthiwa lapho behlala khona amafoni awadonsi. Baze batholakale emafonini uma bengekho ekhaya.